在网上流传一张相，一群基督徒喺平安夜于油麻地天后庙外举行报佳音活动。从相片可见，一群约三十人的基督徒穿上诗班袍在庙的围墙前聚集，而在该墙上挂咗一块写有「圣诞报佳音」嘅横额。
网民的反应十分一面倒咁认为基督徒十分不尊重其他宗教。有人认为咁系属于「挑机」，也有人反问点解基督徒唔去清真寺。
讲到底，今次呢间教会比人责骂，根本原因系香港基督教已经无哂形象：对民主唔支持，立场唔单止保守仲好建制。
庙宇前地作为公共空间？
中国式的庙宇，庙前嘅空地一般为社区空间，供结社用途。例如一九六六年苏守忠反对天星小轮加价的运动，就系喺天后庙外集会。平日，街坊都会聚喺庙前做运动，吹水，捉棋等等。教会喺到唱下歌，其实同啲街坊运用个空间都无咩分别。
另外，当晚天后庙于六点关门，理论上无阻碍善男信女祈福。报佳音嘅团队将横额挂喺庙嘅外墙，系其中一个可议之处。如果间庙话唔俾而佢哋夹硬咁做，就真系有问题。但系，今次都睇得出，间庙可能仲大方过啲建制教会，因为福临教会恒常咁挂「耶稣是主」横额咁多年，天后庙都唔当一回事。（当然，如天后庙个边唔比人喺佢哋外墙挂横额，咁就同教会一样咁小器罗）
所以，基督教嘅教牧应该向天后庙学下嘢啦！应该将宗教场所变成公共空间。例如，教会嘅负责人都应该要开放自己教堂外墙比人挂吓Banner，占领嗰阵教会开放会址比占领者，就系实践呢样野。任何人都应该去用吓呢啲公共空间，而唔系只有呢间教会用。
耶稣在庙街——脉络介绍
有唔少网民会问点解要喺间庙而唔喺清真寺出面报佳音。呢一个不解系源于对事件脉络嘅唔认识。福临教会同天后庙，喺庙街已经共存咗好耐，其实一直都无咩争议。
福临教会之所以会讲「耶稣在庙街」，系因为创会牧师黎振满八十年代喺油麻地宣教时，睇到呢个社区聚集咗好多弱势社群（新移民、露宿者、妓女、老人）， 于是产生咗要喺庙街建立教会，服侍当中弱势人士嘅谂法。佢哋目前嘅事工包括向露宿者派饭、社区探访等。
笔者参加过福临教会嘅聚会同布道会。呢间教会逢双月份嘅第一个礼拜五就会喺榕树头公园搞布道会。其中一个布道工具就系福音解签！即系将圣经故事变成签文，喺天后庙外摆档俾人求签，仲有教友做庙祝帮你解签添！平心而论其实都不失为有创意嘅跨宗教交流尝试。有网民话下次要去教会求签，其实呢间教会一早有咁嘅服务，大家不妨去参加下。
挑机唔系重点
网民嘅讨论主要围绕喺教会嘅意图，而不满嘅主要原因系觉得间教会喺度挑机，唔尊重其他信仰。
但挑机与否并唔系重点，一嚟间教会嘅意图系无办法证实或者证伪 ; 二嚟，挑机作为一种公共讨论，喺容许多元价值嘅社会，系值得鼓励嘅。有越多嘅论述，就越能够推进社会嘅发展。如果有任何人唔认同呢种论述，大可以自己提出另一种论述同佢分庭抗礼。就好似大家去Tree Gun度唱〈喜气洋洋〉咁，只要系公共空间大家开心share用。
跨宗教交流先系出路
有网民话要去教会出面念佛经，又或者去读可兰经，其实真系可以做。嗱，无错啦，宗教间就应该有多啲交流同对话，而唔系教会单向咁表达基督教信息。
不论系教会、清真寺、锡克庙、定佛教庙宇，只要佢地前面系公共空间就可以用。公共空间嘅原意就系要俾唔同嘅人用。喺教会外边查佛经，又或者喺天后庙出面布道，唔单单系一种跨宗教交流，亦都体现出社会嘅多元。
报佳音？
的确，报佳音令人反感，系因为段佳音同我哋嘅生活经验无关。喺度唱诗歌庆祝节日，霸咗啲地方唔知对个社会有咩用。香港人愁紧普选、东北、「网络廿三条」嗰阵，啲教徒就系度唱歌话平安喜乐，真系劲讽刺罗。
不过，如果教会喺油麻地霸个公共空间，唔系喺度唱〈主能够〉，而系唱〈拉朱经纬〉，叫人反对警权过大。或者系叫人反对「网络廿三条」，维护言论自由。或者系叫人帮下露宿者，叫政府唔好挂住用政策帮大有钱佬。大家会唔会觉得呢啲佳音，先至系我哋想听？
上帝用受压迫者、贫穷人嘅身份到世界上，其实就系要去解放啲俾制度压迫嘅人，例如日日面对政府压迫嘅港人。报佳音，应该系要讲呢啲。
编按：文章由香港基督徒学生运动提供。本文标题为编者所拟，原标题为「教会犯众憎，搞着报佳音」，全文载于https://medium.com/@scmhk/%E6%95%99%E6%9C%83%E7%8A%AF%E7%9C%BE%E6%86%8E-%E6%90%9E%E8%91%97%E5%A0%B1%E4%BD%B3%E9%9F%B3-5947830e2dc6#.lzuexb89a。
（http://christiantimes.org.hk，时代论坛时代讲场，2015.12.26）
