在網上流傳一張相，一群基督徒喺平安夜於油麻地天后廟外舉行報佳音活動。從相片可見，一群約三十人的基督徒穿上詩班袍在廟的圍牆前聚集，而在該牆上掛咗一塊寫有「聖誕報佳音」嘅橫額。
網民的反應十分一面倒咁認為基督徒十分不尊重其他宗教。有人認為咁係屬於「挑機」，也有人反問點解基督徒唔去清真寺。
講到底，今次呢間教會比人責罵，根本原因係香港基督教已經無哂形象：對民主唔支持，立場唔單止保守仲好建制。
廟宇前地作為公共空間？
中國式的廟宇，廟前嘅空地一般為社區空間，供結社用途。例如一九六六年蘇守忠反對天星小輪加價的運動，就係喺天后廟外集會。平日，街坊都會聚喺廟前做運動，吹水，捉棋等等。教會喺到唱下歌，其實同啲街坊運用個空間都無咩分別。
另外，當晚天后廟於六點關門，理論上無阻礙善男信女祈福。報佳音嘅團隊將橫額掛喺廟嘅外牆，係其中一個可議之處。如果間廟話唔俾而佢哋夾硬咁做，就真係有問題。但係，今次都睇得出，間廟可能仲大方過啲建制教會，因為福臨教會恆常咁掛「耶穌是主」橫額咁多年，天后廟都唔當一回事。（當然，如天后廟個邊唔比人喺佢哋外牆掛橫額，咁就同教會一樣咁小器囉）
所以，基督教嘅教牧應該向天后廟學下嘢啦！應該將宗教場所變成公共空間。例如，教會嘅負責人都應該要開放自己教堂外牆比人掛吓Banner，佔領嗰陣教會開放會址比佔領者，就係實踐呢樣野。任何人都應該去用吓呢啲公共空間，而唔係只有呢間教會用。
耶穌在廟街——脈絡介紹
有唔少網民會問點解要喺間廟而唔喺清真寺出面報佳音。呢一個不解係源於對事件脈絡嘅唔認識。福臨教會同天后廟，喺廟街已經共存咗好耐，其實一直都無咩爭議。
福臨教會之所以會講「耶穌在廟街」，係因為創會牧師黎振滿八十年代喺油麻地宣教時，睇到呢個社區聚集咗好多弱勢社群（新移民、露宿者、妓女、老人）， 於是產生咗要喺廟街建立教會，服侍當中弱勢人士嘅諗法。佢哋目前嘅事工包括向露宿者派飯、社區探訪等。
筆者參加過福臨教會嘅聚會同佈道會。呢間教會逢雙月份嘅第一個禮拜五就會喺榕樹頭公園搞佈道會。其中一個佈道工具就係福音解籤！即係將聖經故事變成籤文，喺天后廟外擺檔俾人求籤，仲有教友做廟祝幫你解籤添！平心而論其實都不失為有創意嘅跨宗教交流嘗試。有網民話下次要去教會求籤，其實呢間教會一早有咁嘅服務，大家不妨去參加下。
挑機唔係重點
網民嘅討論主要圍繞喺教會嘅意圖，而不滿嘅主要原因係覺得間教會喺度挑機，唔尊重其他信仰。
但挑機與否並唔係重點，一嚟間教會嘅意圖係無辦法證實或者證偽 ; 二嚟，挑機作為一種公共討論，喺容許多元價值嘅社會，係值得鼓勵嘅。有越多嘅論述，就越能夠推進社會嘅發展。如果有任何人唔認同呢種論述，大可以自己提出另一種論述同佢分庭抗禮。就好似大家去Tree Gun度唱〈喜氣洋洋〉咁，只要係公共空間大家開心share用。
跨宗教交流先係出路
有網民話要去教會出面念佛經，又或者去讀可蘭經，其實真係可以做。嗱，無錯啦，宗教間就應該有多啲交流同對話，而唔係教會單向咁表達基督教信息。
不論係教會、清真寺、錫克廟、定佛教廟宇，只要佢地前面係公共空間就可以用。公共空間嘅原意就係要俾唔同嘅人用。喺教會外邊查佛經，又或者喺天后廟出面佈道，唔單單係一種跨宗教交流，亦都體現出社會嘅多元。
報佳音？
的確，報佳音令人反感，係因為段佳音同我哋嘅生活經驗無關。喺度唱詩歌慶祝節日，霸咗啲地方唔知對個社會有咩用。香港人愁緊普選、東北、「網絡廿三條」嗰陣，啲教徒就係度唱歌話平安喜樂，真係勁諷刺囉。
不過，如果教會喺油麻地霸個公共空間，唔係喺度唱〈主能夠〉，而係唱〈拉朱經緯〉，叫人反對警權過大。或者係叫人反對「網絡廿三條」，維護言論自由。或者係叫人幫下露宿者，叫政府唔好掛住用政策幫大有錢佬。大家會唔會覺得呢啲佳音，先至係我哋想聽？
上帝用受壓迫者、貧窮人嘅身份到世界上，其實就係要去解放啲俾制度壓迫嘅人，例如日日面對政府壓迫嘅港人。報佳音，應該係要講呢啲。
編按：文章由香港基督徒學生運動提供。本文標題為編者所擬，原標題為「教會犯眾憎，搞著報佳音」，全文載於https://medium.com/@scmhk/%E6%95%99%E6%9C%83%E7%8A%AF%E7%9C%BE%E6%86%8E-%E6%90%9E%E8%91%97%E5%A0%B1%E4%BD%B3%E9%9F%B3-5947830e2dc6#.lzuexb89a。
（http://christiantimes.org.hk，時代論壇時代講場，2015.12.26）
