（摄影：Chris Lau）
一年一度CAS音乐营又到喇，笔者今年有一个特别安排，就系约到近半年曝光率非常高的金培达Peter做访问，不过呢次唔系要访问佢，而系要搵佢访问人──被访者系作风低调但为人熟悉的叶富生Steven。不爱做访问的Steven，今次被相识于年青时的Peter访问到口若悬河，都算没有浪费笔者一番功夫。
执教推动‧承师启后
金：「Hi Steven。」
叶：「hi……」
金：「我访问你喎，好难得！」
叶：「哈！」
金：「好难得我访问你，唔系好难得你接受我访问，哈哈哈……」
叶：「系呀！哈……」
金：「我识左你咁耐，你一路都教唱歌，都教左咁多年，当年大家系Room mate时，好似你日日都练歌，但教系另一回事，教唱歌其实都几辛苦，都教左咁多年，点解你仲可以坚持咁耐，仲继续有动力教呢？」
叶：「其实传统学唱歌或者教唱歌都系几抽象的一件事，我以前都跟过好多老师，心里面成日都有好多关于唱歌技巧的问题，但系有时唔识点问，我记得我最后果位老师，基本上就有晒我想问的答案。」
金：「Ate Rojas。」
叶：「系。其实都好影响我跟住选择去教唱歌，因为唱歌系抽象，但系好多学生心里面都好想好concrete咁捉到，呢个都影响我往后教学生时，我都好想于我能力範围之内，俾我学生有比较concrete的一套方式，等佢地慢慢去build up佢地自己knowledge。」
金：「而家我谂资讯比较发达，好多人都会话用边套方法教唱歌，香港而家流行讲其中有一套Speech Level Singing，咁你套教学方式有无咩名堂呢？」
叶：「头先你讲起 Speech Level Singing，我最后位老师，佢其实都系受Speech Level Singing影响，佢就无话佢系教Speech Level Singing，但系教的过程里面所包含的理念其实都系同Speech Level Singing有少少关系。」
金：「所以佢有Speech Level Singing的元素，可能自己改良少少，然后传到你，你又加左的自己经验落去。」
叶：「系。」
叶氏教法 v. 新派唱法
叶：「而家有好多唔同方式，其实代表咩呢？某些人觉得好confuse，其实基本上代表唱歌技巧用声上，由一个比较好『感觉』的层面，慢慢因为科技发达，开始慢慢越黎越去到physiological里头……」
金：「即系『感觉』到去边度？」
叶：「『感觉』到都唔止，其实有时我地感觉到未必系真系咁样。」
金：「明白、明白……呢个我好清楚，我感觉到，我唱唔到！哈哈……」
叶：「所以that's why而家开始，慢慢隔几年你又听到有一套比较崭新的方法，就系因为而家系响研究singing technique上面越黎越清晰，好实在，好concrete去认识我地自己个乐器，咁然后先至因为越黎越认识个结构，去调较，再慢慢先去到『感觉』的层面……所以系Speech Level Singing其中一样，同Speech Level Singing差不多同期又有另外一套，呢个就唔系太多人知道……其实8月会有一个workshop，就会系其中一个讲呢一套。」
金：「即系除左CAS之外系咪？」
叶：「系呀……除左CAS之外。」
金：「哦，即系你做Deputy Head of Vocal Department果间……咁响外国另外有一套可能比Speech Level Singing无咁出名…」
叶：「其实都好出名，但未必系Speech Level Singing咁popular。」
金：「所以我地需要好似你咁样的一位导师，我谂做学生，佢地未必有咁多资源知道咁多唔同的方式，咁就要靠好导师。因为你继续进步紧，多睇新方式，跟你学的学生就受惠。」
金：「我知道你的学生其实好多元化，我知道有唱片公司Artist，有一般跟你学唱歌的，亦有好多基督徒，其实你会唔会因为佢地系基督徒，你的教学方式就会唔同呢？会唔会有分别呢？」
叶：「基本上系无分别，因为初初学习的过程里面其实都系要慢慢认识自己个乐器，响认识里面慢慢去改坏习惯，然后变番有一个正确的习惯。」
金：「所以就系一些根底性的功夫，不论系事奉或者表演也好，其实都系无变。」
叶：「无错。」
更新与需要
金：「今年CAS较往年有特色，课程都系同vocal有关，以往其实CAS音乐营都系以多元化为主，包罗万有，但系点解今年会有呢个转变？有咩谂法令你觉得今年专门讲一个题目呢？」
叶：「其实有听过CAS同埋参加过CAS的朋友都知道我地每年都好多元化，好多类型的subject matters，其实我地一路都有倾过，除左系多元化的营会之馀，我地都想搞专题的workshop或者day camp，于是就谂，不如今年尝试啦…当然我地选择第一次就搞vocal，最主要系觉得，尤其于教会里面，音乐事奉里面，大部份都系……」
金：「唱为主？」
叶：「系喇，咁不如就讲呢方面啦，其实都觉得教会有好大需要，因为一年里面，每年都有好几间教会搵我去搞workshop俾佢地敬拜队，同埋当然接触到教会的singers，或者我而家自己的学生，好多人都对用声、对唱歌上面都有需要，同埋都有唔少人于用声上面系有问题。」
金：「可能大部分都有，因为其实大家唱歌都系就咁开口唱啦。」
叶：「系喇。」
金：「无咩特别谂话要去学。」
叶：「无错系喇。」
金：「弹乐器呢，你唔识弹，就系唔识弹……但系唱就系开口就唱，只要唔好走音就得喇。」
叶：「系。」
主题大不同
金：「咁你同我都系CAS的founders，基本上每年的workshop我地都系有教，咁今年正所谓开正你果瓣，咁你教的课程特色又会系点样呢？或者什至可以讲讲，今年既然全部系vocal，其实有咩类型的科目？」
叶：「今年当然系very exciting啦，一个主题全部都系vocal，或者vocal有关的课程，今年除左我，我同你年年都有教，今年就好开心啦，我地搵到曾路得，曾路得系一位好资深的唱歌老师，现任伯乐音乐学院Honorary Chief Consultant of Vocal Department；杨淑贞啦，我谂好多人都识得Sara喇，而家暂时响教授唱歌上面就系三位，可能我地三个导师的background、教学方法都唔同，但系其实就系正正系想咁样，唔同导师唔同approach，系俾大家弟兄姊妹接触到，会唔会好confuse呢，on the contrary，反而系因为我地大家approach唔同呢，令学生要谂多些，思考多些，多发问题…」
金：「我自己都跟过唔同先生学习，我发觉都有夹同唔夹，学习好多时候，听落有一套就好神奇个个得，你去学可能就未必得，只要唔好三个一齐就得喇，应该都唔会太confuse。」
叶：「系喇。」
金：「以上所讲都关于唱歌上的，其他仲会有咩呢？」
叶：「其他当然配合番教会需要，比如我地都有小组合唱workshop，包括组织上、rehearsal上的technique、blending等方面，当然我地都有旧年帮手的陈美凤细May教一堂编和音，今年都教多堂进深班。」
金：「旧年我谂都几好玩，我地有现场真人示範。」
叶：「旧年佢邀请左佢四个老友记做一个好professional chorus示範，反应好好，我地今年希望都可以系咁；会请你讲个workshop啦，因为好多vocalist都识弹少少乐器，咁就想搵你教一堂系有Melody，点样配简单的和弦chord，我谂好多人都想知，当然我地今年都会有耳鼻喉医生黎讲常识啦。」
金：「保健常识。」
叶：「系，我地以往都有试过，反应都好热烈，仲有……」
金：「仲有vocal监制啦！」
叶：「系喇，仲有你啦，你都响伯乐音乐学院教紧，仲系Head of Film Scoring / Music Arranging Department添，哈哈……因为而家发觉，呢几年好多基督教制作，尤其是好多教会自己制作番，有见及此，我地都谂有一个workshop系produce vocal方面。」
金：「不过呢样野其实几抽象，你对住录音室，你同佢讲咩呢？你唔响度其实都录到喎？」
叶：「系喇，即系话比较起你平时同一个group去练习，同埋我地响录音室里面去要求去教一样野，系有唔同。」
金：「咁听落都几包罗万有。」
叶：「系呀！」
金：「哗，我都好想去喎……呀，不过我其实我系会去架！哈哈哈……」
叶：「……哈哈哈……」
金：「咁今日个访问去到呢度啦！」
叶：「Thank you！」
（特别鸣谢伯乐音乐学院借出访问场地）
有关CAS营会的详情，可浏览：http://www.christiantimes.org.hk/Common/Reader/News/ShowNews.jsp?Nid=35585&Pid=5&Version=0&Cid=221&Charset=big5_hkscs
