（攝影：Chris Lau）
一年一度CAS音樂營又到喇，筆者今年有一個特別安排，就係約到近半年曝光率非常高的金培達Peter做訪問，不過呢次唔係要訪問佢，而係要搵佢訪問人──被訪者係作風低調但為人熟悉的葉富生Steven。不愛做訪問的Steven，今次被相識於年青時的Peter訪問到口若懸河，都算沒有浪費筆者一番功夫。
執教推動‧承師啟後
金：「Hi Steven。」
葉：「hi……」
金：「我訪問你喎，好難得！」
葉：「哈！」
金：「好難得我訪問你，唔係好難得你接受我訪問，哈哈哈……」
葉：「係呀！哈……」
金：「我識左你咁耐，你一路都教唱歌，都教左咁多年，當年大家係Room mate時，好似你日日都練歌，但教係另一回事，教唱歌其實都幾辛苦，都教左咁多年，點解你仲可以堅持咁耐，仲繼續有動力教呢？」
葉：「其實傳統學唱歌或者教唱歌都係幾抽象的一件事，我以前都跟過好多老師，心裏面成日都有好多關於唱歌技巧的問題，但係有時唔識點問，我記得我最後果位老師，基本上就有晒我想問的答案。」
金：「Ate Rojas。」
葉：「係。其實都好影響我跟住選擇去教唱歌，因為唱歌係抽象，但係好多學生心裏面都好想好concrete咁捉到，呢個都影響我往後教學生時，我都好想於我能力範圍之內，俾我學生有比較concrete的一套方式，等佢地慢慢去build up佢地自己knowledge。」
金：「而家我諗資訊比較發達，好多人都會話用邊套方法教唱歌，香港而家流行講其中有一套Speech Level Singing，咁你套教學方式有無咩名堂呢？」
葉：「頭先你講起 Speech Level Singing，我最後位老師，佢其實都係受Speech Level Singing影響，佢就無話佢係教Speech Level Singing，但係教的過程裏面所包含的理念其實都係同Speech Level Singing有少少關係。」
金：「所以佢有Speech Level Singing的元素，可能自己改良少少，然後傳到你，你又加左的自己經驗落去。」
葉：「係。」
葉氏教法 v. 新派唱法
葉：「而家有好多唔同方式，其實代表咩呢？某些人覺得好confuse，其實基本上代表唱歌技巧用聲上，由一個比較好『感覺』的層面，慢慢因為科技發達，開始慢慢越黎越去到physiological裏頭……」
金：「即係『感覺』到去邊度？」
葉：「『感覺』到都唔止，其實有時我地感覺到未必係真係咁樣。」
金：「明白、明白……呢個我好清楚，我感覺到，我唱唔到！哈哈……」
葉：「所以that's why而家開始，慢慢隔幾年你又聽到有一套比較嶄新的方法，就係因為而家係響研究singing technique上面越黎越清晰，好實在，好concrete去認識我地自己個樂器，咁然後先至因為越黎越認識個結構，去調較，再慢慢先去到『感覺』的層面……所以係Speech Level Singing其中一樣，同Speech Level Singing差不多同期又有另外一套，呢個就唔係太多人知道……其實8月會有一個workshop，就會係其中一個講呢一套。」
金：「即係除左CAS之外係咪？」
葉：「係呀……除左CAS之外。」
金：「哦，即係你做Deputy Head of Vocal Department果間……咁響外國另外有一套可能比Speech Level Singing無咁出名…」
葉：「其實都好出名，但未必係Speech Level Singing咁popular。」
金：「所以我地需要好似你咁樣的一位導師，我諗做學生，佢地未必有咁多資源知道咁多唔同的方式，咁就要靠好導師。因為你繼續進步緊，多睇新方式，跟你學的學生就受惠。」
金：「我知道你的學生其實好多元化，我知道有唱片公司Artist，有一般跟你學唱歌的，亦有好多基督徒，其實你會唔會因為佢地係基督徒，你的教學方式就會唔同呢？會唔會有分別呢？」
葉：「基本上係無分別，因為初初學習的過程裏面其實都係要慢慢認識自己個樂器，響認識裏面慢慢去改壞習慣，然後變番有一個正確的習慣。」
金：「所以就係一些根底性的功夫，不論係事奉或者表演也好，其實都係無變。」
葉：「無錯。」
更新與需要
金：「今年CAS較往年有特色，課程都係同vocal有關，以往其實CAS音樂營都係以多元化為主，包羅萬有，但係點解今年會有呢個轉變？有咩諗法令你覺得今年專門講一個題目呢？」
葉：「其實有聽過CAS同埋參加過CAS的朋友都知道我地每年都好多元化，好多類型的subject matters，其實我地一路都有傾過，除左係多元化的營會之餘，我地都想搞專題的workshop或者day camp，於是就諗，不如今年嘗試啦…當然我地選擇第一次就搞vocal，最主要係覺得，尤其於教會裏面，音樂事奉裏面，大部份都係……」
金：「唱為主？」
葉：「係喇，咁不如就講呢方面啦，其實都覺得教會有好大需要，因為一年裏面，每年都有好幾間教會搵我去搞workshop俾佢地敬拜隊，同埋當然接觸到教會的singers，或者我而家自己的學生，好多人都對用聲、對唱歌上面都有需要，同埋都有唔少人於用聲上面係有問題。」
金：「可能大部分都有，因為其實大家唱歌都係就咁開口唱啦。」
葉：「係喇。」
金：「無咩特別諗話要去學。」
葉：「無錯係喇。」
金：「彈樂器呢，你唔識彈，就係唔識彈……但係唱就係開口就唱，只要唔好走音就得喇。」
葉：「係。」
主題大不同
金：「咁你同我都係CAS的founders，基本上每年的workshop我地都係有教，咁今年正所謂開正你果瓣，咁你教的課程特色又會係點樣呢？或者甚至可以講講，今年既然全部係vocal，其實有咩類型的科目？」
葉：「今年當然係very exciting啦，一個主題全部都係vocal，或者vocal有關的課程，今年除左我，我同你年年都有教，今年就好開心啦，我地搵到曾路得，曾路得係一位好資深的唱歌老師，現任伯樂音樂學院Honorary Chief Consultant of Vocal Department；楊淑貞啦，我諗好多人都識得Sara喇，而家暫時響教授唱歌上面就係三位，可能我地三個導師的background、教學方法都唔同，但係其實就係正正係想咁樣，唔同導師唔同approach，係俾大家弟兄姊妹接觸到，會唔會好confuse呢，on the contrary，反而係因為我地大家approach唔同呢，令學生要諗多些，思考多些，多發問題…」
金：「我自己都跟過唔同先生學習，我發覺都有夾同唔夾，學習好多時候，聽落有一套就好神奇個個得，你去學可能就未必得，只要唔好三個一齊就得喇，應該都唔會太confuse。」
葉：「係喇。」
金：「以上所講都關於唱歌上的，其他仲會有咩呢？」
葉：「其他當然配合番教會需要，比如我地都有小組合唱workshop，包括組織上、rehearsal上的technique、blending等方面，當然我地都有舊年幫手的陳美鳳細May教一堂編和音，今年都教多堂進深班。」
金：「舊年我諗都幾好玩，我地有現場真人示範。」
葉：「舊年佢邀請左佢四個老友記做一個好professional chorus示範，反應好好，我地今年希望都可以係咁；會請你講個workshop啦，因為好多vocalist都識彈少少樂器，咁就想搵你教一堂係有Melody，點樣配簡單的和弦chord，我諗好多人都想知，當然我地今年都會有耳鼻喉醫生黎講常識啦。」
金：「保健常識。」
葉：「係，我地以往都有試過，反應都好熱烈，仲有……」
金：「仲有vocal監製啦！」
葉：「係喇，仲有你啦，你都響伯樂音樂學院教緊，仲係Head of Film Scoring / Music Arranging Department添，哈哈……因為而家發覺，呢幾年好多基督教製作，尤其是好多教會自己製作番，有見及此，我地都諗有一個workshop係produce vocal方面。」
金：「不過呢樣野其實幾抽象，你對住錄音室，你同佢講咩呢？你唔響度其實都錄到喎？」
葉：「係喇，即係話比較起你平時同一個group去練習，同埋我地響錄音室裏面去要求去教一樣野，係有唔同。」
金：「咁聽落都幾包羅萬有。」
葉：「係呀！」
金：「嘩，我都好想去喎……呀，不過我其實我係會去架！哈哈哈……」
葉：「……哈哈哈……」
金：「咁今日個訪問去到呢度啦！」
葉：「Thank you！」
（特別鳴謝伯樂音樂學院借出訪問場地）
有關CAS營會的詳情，可瀏覽：http://www.christiantimes.org.hk/Common/Reader/News/ShowNews.jsp?Nid=35585&Pid=5&Version=0&Cid=221&Charset=big5_hkscs
