本集内容：
相信大家都从报纸新闻既报导知道，公立医院近几年出现逃亡潮：不论是医生、护士抑或不同的专职治疗人员，流失率都创近年新高。很多部门也出现人手不足，有些医院什至要由顾问医生兼任年轻医生的工作，大家都筋疲力竭，苦不堪言……
【按此收听】
全文：
相信大家都从报纸新闻既报导知道，公立医院近几年出现逃亡潮：无论系医生、护士抑或系唔同专职治疗人员，流失率都创近年新高。好多部门都出现人手不足既问题，有些医院什至要由顾问医生兼任年青医生既工作。好多同事都做到筋疲力竭，苦不堪言。无时间食饭、什至无时间去厕所，再唔系老师既专利。
员工士气低落再唔系乜野秘密，而基督徒员工亦唔能够幸免。当初满怀热诚服待病人，今日满布伤痕只求早日解脱既弟兄姊妹为数唔少。有家室既为了儿女有稳定生活惟有捱落去，年青又或者无后顾之忧既同事，就每时每刻都系度谂点样离开依个困兽斗既地方。你可以明白，点解公立医院越来越难见到医护人员既乐观既笑容同埋亲切既慰问，因为负责照顾心力交瘁既病人既人都一样心力交瘁。
虽然依个公营医疗机构系以「开心员工」(Happy Staff)，作为机构既使命目标之一，但系，如果你教会有朋友系依间机构做野，你都会知道好多都系返工返得好唔好心，好大压力。刚刚毕业既时候，佢可能带住异象和理想进入职场，唔够两三年就已经成个人散晒，唔愿返工，唔想再提病人既故事，什至每日都打算跳槽。心理学上我地叫依种既状况为指burnout，又或者系工作枯竭。
工作枯竭并唔系一件新鲜又或罕见既事。类似情况系好多消耗情感精神既职业上，好似系教师、传道人、社工等屡见不鲜。工作枯竭既表征主要有以下三点，分别系情绪虚脱、态度犬儒以及工作缺乏效率。过去十几年香港已经开始进行关于工作枯竭既研究，有人力资源公司什至发现香港系亚洲众多城市中，员工枯竭率最高既一个。好可惜，系依个重视生产结果，无视个人价值同需要既所谓国际大都会，有关研究结果一直无被顾主什至政府所注视。
教会点样牧养一班工作枯竭既弟兄姊妹？相信好多受过教牧辅导学既同工领袖比我更有经验更有资格去讲依个题目。员工压力管理固然系唔少机构所采用来抗衡工作枯竭既招数，但如果我地唔去改变机构什至整个城市，依种「将员工看作为生产工具既价值观」，以及「无视员工心理健康既管理文化」，工作枯竭就只会好似传染病一样流行什至爆发。
我地既信仰，相信每一个人都有上帝既形象系背后，并要行公义、好怜悯，向罪恶说不；但系当我地话要为信徒在日常生活中活出国度文化和原则去祈祷既同时，却无视政治、经济、医疗同教育层面中，果Ｄ「员工工具化」以及「员工非人化」既价值取向，纵容什至助长政府同机构剥削员工既心力以及精神健康；我地既祈祷就会变得自商矛盾。
教会点样去抗衡工作枯竭，除了关顾个别肢体既心灵需要外，我地更应该关注社会既文化以及政府既政策。教会当中有好多弟兄姊妹做紧老师，教师亦系员工枯竭既重灾区。我地除左表达对佢地既关心同支持外，有无谂个系一Ｄ教育政策上为佢地发声？好多老师都做到得番半条人命，但政府一直拒绝推行小班教学，着眼点只在于政府的财政开支，而非提高教学环境质素。一个讲求成本效益既城市价值，系唔系我地信仰所支持什至信奉呢？我地未必系政府既官员，但系作为学生既家长、作为学生团契既导师，我地会唔会忘记左自己既位份，怯于发声呢？
工作枯竭看来是一个好大既课题，但对个人精神健康以及社会发展有好深远既影响。除了员工个人心理质素外，机构价值以及社会文化都有直接既影响。究竟我地既信仰，你枯竭左既员工既心灵鸦片，抑或系抗衡非人文化既最佳宝剑呢？
主持：
胡金荣医生
主持的话：
作为一位医生，每次看见人体构造的奇妙，我便不得不赞叹神的工作。因此我很高兴能有机会在这里跟大家分享我在信仰上的一些反思，以及医疗服事上的一些体会。
（www.christiantimes.org.hk，时代论坛网上电台，2010.9.18）
