本集內容：
相信大家都從報紙新聞既報導知道，公立醫院近幾年出現逃亡潮：不論是醫生、護士抑或不同的專職治療人員，流失率都創近年新高。很多部門也出現人手不足，有些醫院甚至要由顧問醫生兼任年輕醫生的工作，大家都筋疲力竭，苦不堪言……
【按此收聽】
全文：
相信大家都從報紙新聞既報導知道，公立醫院近幾年出現逃亡潮：無論係醫生、護士抑或係唔同專職治療人員，流失率都創近年新高。好多部門都出現人手不足既問題，有些醫院甚至要由顧問醫生兼任年青醫生既工作。好多同事都做到筋疲力竭，苦不堪言。無時間食飯、甚至無時間去廁所，再唔係老師既專利。
員工士氣低落再唔係乜野秘密，而基督徒員工亦唔能夠倖免。當初滿懷熱誠服待病人，今日滿佈傷痕只求早日解脫既弟兄姊妹為數唔少。有家室既為了兒女有穩定生活惟有捱落去，年青又或者無後顧之憂既同事，就每時每刻都係度諗點樣離開依個困獸鬥既地方。你可以明白，點解公立醫院越來越難見到醫護人員既樂觀既笑容同埋親切既慰問，因為負責照顧心力交瘁既病人既人都一樣心力交瘁。
雖然依個公營醫療機構係以「開心員工」(Happy Staff)，作為機構既使命目標之一，但係，如果你教會有朋友係依間機構做野，你都會知道好多都係返工返得好唔好心，好大壓力。剛剛畢業既時候，佢可能帶住異象和理想進入職場，唔夠兩三年就已經成個人散晒，唔願返工，唔想再提病人既故事，甚至每日都打算跳槽。心理學上我地叫依種既狀況為指burnout，又或者係工作枯竭。
工作枯竭並唔係一件新鮮又或罕見既事。類似情況係好多消耗情感精神既職業上，好似係教師、傳道人、社工等屢見不鮮。工作枯竭既表徵主要有以下三點，分別係情緒虛脫、態度犬儒以及工作缺乏效率。過去十幾年香港已經開始進行關於工作枯竭既研究，有人力資源公司甚至發現香港係亞洲眾多城市中，員工枯竭率最高既一個。好可惜，係依個重視生產結果，無視個人價值同需要既所謂國際大都會，有關研究結果一直無被顧主甚至政府所注視。
教會點樣牧養一班工作枯竭既弟兄姊妹？相信好多受過教牧輔導學既同工領袖比我更有經驗更有資格去講依個題目。員工壓力管理固然係唔少機構所採用來抗衡工作枯竭既招數，但如果我地唔去改變機構甚至整個城市，依種「將員工看作為生產工具既價值觀」，以及「無視員工心理健康既管理文化」，工作枯竭就只會好似傳染病一樣流行甚至爆發。
我地既信仰，相信每一個人都有上帝既形象係背後，並要行公義、好憐憫，向罪惡說不；但係當我地話要為信徒在日常生活中活出國度文化和原則去祈禱既同時，卻無視政治、經濟、醫療同教育層面中，果Ｄ「員工工具化」以及「員工非人化」既價值取向，縱容甚至助長政府同機構剝削員工既心力以及精神健康；我地既祈禱就會變得自商矛盾。
教會點樣去抗衡工作枯竭，除了關顧個別肢體既心靈需要外，我地更應該關注社會既文化以及政府既政策。教會當中有好多弟兄姊妹做緊老師，教師亦係員工枯竭既重災區。我地除左表達對佢地既關心同支持外，有無諗個係一Ｄ教育政策上為佢地發聲？好多老師都做到得番半條人命，但政府一直拒絕推行小班教學，著眼點只在於政府的財政開支，而非提高教學環境質素。一個講求成本效益既城市價值，係唔係我地信仰所支持甚至信奉呢？我地未必係政府既官員，但係作為學生既家長、作為學生團契既導師，我地會唔會忘記左自己既位份，怯於發聲呢？
工作枯竭看來是一個好大既課題，但對個人精神健康以及社會發展有好深遠既影響。除了員工個人心理質素外，機構價值以及社會文化都有直接既影響。究竟我地既信仰，你枯竭左既員工既心靈鴉片，抑或係抗衡非人文化既最佳寶劍呢？
主持：
胡金榮醫生
主持的話：
作為一位醫生，每次看見人體構造的奇妙，我便不得不讚歎神的工作。因此我很高興能有機會在這裡跟大家分享我在信仰上的一些反思，以及醫療服事上的一些體會。
（www.christiantimes.org.hk，時代論壇網上電台，2010.9.18）
