唔信耶稣嘅人都会做义工，信耶稣嘅人反而有时只系识刻意传福音、叫人返教会；唔信嘅社关人可能行动好激进但都对个社区有impact，信嘅人可能剩系识祈祷。极端啲讲，咁如果接触到嘅街坊信咗耶稣，系咪就唔使关心佢哋呢？我哋可能又会谂：一至五返工都够忙，礼拜六日畀埋教会仲唔够？额外花时间落区做乜？
啱啱1号夜晚打听到隧道会喺2号清场。寻晚再入去，真系9成空。探开嘅露宿者有啲冇电话，有啲成日换电话号码（储值卡），所以冇办法直接搵返晒佢哋。而当呢个曾经系佢哋嘅家都已经被粉饰太平，我哋仲可以去边度搵返佢哋？调返转问吓自己：既然可见嘅需要已经消失咗，我系咪要刻意制造呢度仍然有需要嘅假象，自我满足呢？当使命随着环境转变而完结，欣然接受或许都系一件好事？
愈谂愈迷惘，都系走返入公园睇吓咩环境。殊不知喺同其他街坊展开咗「激情对话」嘅时候，又有另一番发现同体会：有个上咗楼嘅露宿者习惯咗落返嚟球场睇波、叔叔阿姨食完饭无嘢做就落街做运动、有个保安阿姐把口话露宿者「瞓公园唔啱」，但同佢哋又会一齐饮咖啡⋯⋯呢啲街坊都唔系经济上最有需要嘅人，但唔代表佢哋冇需要，而什至佢哋都有共通嘅渴望：被看见、被聆听。我哋肉眼当然会睇得见佢哋，但系好多时候都选择无视；我哋听得明佢哋讲咩，但好多时都会「选择性失聪」——我哋希望优先服侍最穷、最缺乏嘅人——但当我哋太有目的咁做社关，又会唔会失去紧社关嘅本质呢？
最盏鬼嘅就系啲街坊会关心、什至鼓励返我哋。「打工仔一定辛苦，唔好捱坏自己啊。」「食饱未啊？你咁瘦！」「呢度系我哋主场，你哋都要努力为香港争光啊！」谂返转头，都唔知点解佢哋讲讲吓会讲呢啲。不过呢种自然嘅交流，反而好感受到我哋真系同呢个社区连结紧，而唔系针对某啲对象去施舍。我哋喺过程中什至有种被款待嘅感觉；呢度的确系佢哋嘅社区，佢哋接待咗我哋呢几位有心嘅过客。当中嘅共融、平等、爱嘅流动，岂唔系教会本该展现出嚟嘅咩？喺倾偈嘅嗰一刻，公园彷佛比教会「更教会」，街坊接纳咗我哋呢几位异客进入佢哋嘅社群，向我哋分享自己嘅「好消息」。当佢哋被看见、被聆听，佢哋都会看见、聆听我哋。嗰晚其实我哋冇嘢帮到佢哋，物资都冇带出去，但呢种平等分享、同行关系就系肯定紧双方「被需要」嘅需要。
基督徒做社关，可能更容易迷失。失落嘅时候落区走走，吹吹水，可能就会获得新视角，可以重新检视当下嘅自我。
（相片由作者提供，原载于作者IG）
