Salsool非常热情好客
国际猫猫
有个埃及家庭养咗只唐猫叫Salsool，阿拉伯文嘅意思系「生命」。
Salsool非常热情好客，我哋锺意吸猫，Salsool都好锺意吸人，每个人都一定畀佢吸过先入屋。
但系当全家用阿拉伯文沟通，佢哋就要用英文同只猫讲嘢，因为佢哋话Salsool听唔明阿拉伯文。原来Salsool系一个巴基斯坦裔邻居送畀佢哋，所以只猫嘅母语应该系乌都语，嚟到新嘅家庭惟有用英文生活。
谂起好多难民朋友都系嚟到香港先学英文，几年间由ABC都唔识，到一口非常流利嘅英文，中间嘅过程难以想像，但从中可以见到佢哋非凡嘅学习同适应能力。相反，学广东话真系冇咁容易，一来粤语嘅词汇同语法都比较复杂，二来坊间冇乜有系统嘅学习方法。不过，我认识一个埃及妹妹，佢八岁嚟到香港，透过睇电视同埋睇YouTube，十四岁时佢啲广东话已经同其他香港人一样。
呢只叫Salsool嘅黄猫，象征住好多难民朋友嘅经历。虽然面对好多文化差异带来嘅冲击同困难，但仍然凭住坚强嘅生命力渡过种种难关。
亦同大部份猫奴嘅经历一样，猫猫的确为呢个家庭带来好多欢笑同活力。如果你发现屋企只猫唔系好理你，不妨转一个语言同佢沟通，可能系因为佢听唔明广东话啫。
玩完就瞓觉的Salsool
当我成为了Apple Support
呢个叔叔思想非常跳脱，有时会同你讲科技对人类嘅意义，下一秒讲街边只麻雀令佢谂起儿时回忆。所以每次同佢倾偈，都要好专心听到底佢有咩需要。
有几次原来佢想问我点用电话，佢有一部爆晒mon嘅iPhone7。佢第一次嘅诉求系话，啲notifications只会喺同一个时间弹出嚟，令佢迟咗睇WhatsApp，就会错失啲机会；但又因为太多notifications，令佢觉得好烦好困扰。
于是我熄咗个定时出现通知嘅功能，熄埋啲无用嘅apps嘅通知，教埋佢点样喺WhatsApp send相，佢就好开心地走咗了。个刻觉得，其实佢同我一啲亲戚uncle无分别，都系会因为追唔上科技进步而受困扰，但只要简单做几个步骤，就可以解决佢嘅烦恼同生活嘅不便。
第二次佢嘅问题系，点样喺电话edit录音？于是我又教咗佢一个简单方法。佢好开心咁话，佢问过好多人但无人肯教佢，个个都话唔得閒就赶佢走。佢好开心有人愿意坐低教佢点样用电话。
之后佢分享以前写嘅诗，虽然我睇唔明，但内容大概系：
「语言就是整个世界。因此语言赋予生命，在我们心灵的深处。或许我们最需要的，就是一句说话。」
呢个叔叔令我谂起葡萄牙诗人Fernando Pessoa，佢有一首诗咁样写：
「诗人都是妄想的人。
他们妄想一切所有，什至妄想着痛苦，妄想他真实经历的痛苦。
而那些读者，阅读那些痛楚的时候，并非感受到自身的痛楚，而是他从未认知过的痛。
这条轨道，环绕着满足着我们的理性，这列车厢，他们称之为心。」
Fernando Pessoa的诗英文翻译如下：
"Autopsychography"
The poet is a pretender,
Who pretends so completely
He even pretends to pain
The pain he really feels.
And those who read what he writes,
Reading of pain, feel truly
Neither of those pains he has,
But what they themselves have not.
So round its track goes
Wheeling, to entertain our reason,
This string of carriages
They call the heart.
平安夜教会弟兄姊妹、包括难民和不同国家的人齐集教会门口布佳音
作者负责九龙佑宁堂和平大使╱难民事工，图片由作者提供。
本文属「与难民同行．难民不烂」系列，由难民事工小组提供。
小组由香港的基督教教会和机构组成，一直以来支援在港难民和免遣返声请者
在房屋、教育、心理、生活上的需要，帮助他们融入社会。
