Salsool非常熱情好客
國際貓貓
有個埃及家庭養咗隻唐貓叫Salsool，阿拉伯文嘅意思係「生命」。
Salsool非常熱情好客，我哋鍾意吸貓，Salsool都好鍾意吸人，每個人都一定畀佢吸過先入屋。
但係當全家用阿拉伯文溝通，佢哋就要用英文同隻貓講嘢，因為佢哋話Salsool聽唔明阿拉伯文。原來Salsool係一個巴基斯坦裔鄰居送畀佢哋，所以隻貓嘅母語應該係烏都語，嚟到新嘅家庭惟有用英文生活。
諗起好多難民朋友都係嚟到香港先學英文，幾年間由ABC都唔識，到一口非常流利嘅英文，中間嘅過程難以想像，但從中可以見到佢哋非凡嘅學習同適應能力。相反，學廣東話真係冇咁容易，一來粵語嘅詞彙同語法都比較複雜，二來坊間冇乜有系統嘅學習方法。不過，我認識一個埃及妹妹，佢八歲嚟到香港，透過睇電視同埋睇YouTube，十四歲時佢啲廣東話已經同其他香港人一樣。
呢隻叫Salsool嘅黃貓，象徵住好多難民朋友嘅經歷。雖然面對好多文化差異帶來嘅衝擊同困難，但仍然憑住堅強嘅生命力渡過種種難關。
亦同大部份貓奴嘅經歷一樣，貓貓的確為呢個家庭帶來好多歡笑同活力。如果你發現屋企隻貓唔係好理你，不妨轉一個語言同佢溝通，可能係因為佢聽唔明廣東話啫。
玩完就瞓覺的Salsool
當我成為了Apple Support
呢個叔叔思想非常跳脫，有時會同你講科技對人類嘅意義，下一秒講街邊隻麻雀令佢諗起兒時回憶。所以每次同佢傾偈，都要好專心聽到底佢有咩需要。
有幾次原來佢想問我點用電話，佢有一部爆晒mon嘅iPhone7。佢第一次嘅訴求係話，啲notifications只會喺同一個時間彈出嚟，令佢遲咗睇WhatsApp，就會錯失啲機會；但又因為太多notifications，令佢覺得好煩好困擾。
於是我熄咗個定時出現通知嘅功能，熄埋啲無用嘅apps嘅通知，教埋佢點樣喺WhatsApp send相，佢就好開心地走咗了。個刻覺得，其實佢同我一啲親戚uncle無分別，都係會因為追唔上科技進步而受困擾，但只要簡單做幾個步驟，就可以解決佢嘅煩惱同生活嘅不便。
第二次佢嘅問題係，點樣喺電話edit錄音？於是我又教咗佢一個簡單方法。佢好開心咁話，佢問過好多人但無人肯教佢，個個都話唔得閒就趕佢走。佢好開心有人願意坐低教佢點樣用電話。
之後佢分享以前寫嘅詩，雖然我睇唔明，但內容大概係：
「語言就是整個世界。因此語言賦予生命，在我們心靈的深處。或許我們最需要的，就是一句說話。」
呢個叔叔令我諗起葡萄牙詩人Fernando Pessoa，佢有一首詩咁樣寫：
「詩人都是妄想的人。
他們妄想一切所有，甚至妄想著痛苦，妄想他真實經歷的痛苦。
而那些讀者，閱讀那些痛楚的時候，並非感受到自身的痛楚，而是他從未認知過的痛。
這條軌道，環繞著滿足著我們的理性，這列車廂，他們稱之為心。」
Fernando Pessoa的詩英文翻譯如下：
"Autopsychography"
The poet is a pretender,
Who pretends so completely
He even pretends to pain
The pain he really feels.
And those who read what he writes,
Reading of pain, feel truly
Neither of those pains he has,
But what they themselves have not.
So round its track goes
Wheeling, to entertain our reason,
This string of carriages
They call the heart.
平安夜教會弟兄姊妹、包括難民和不同國家的人齊集教會門口佈佳音
作者負責九龍佑寧堂和平大使╱難民事工，圖片由作者提供。
本文屬「與難民同行．難民不爛」系列，由難民事工小組提供。
小組由香港的基督教教會和機構組成，一直以來支援在港難民和免遣返聲請者
在房屋、教育、心理、生活上的需要，幫助他們融入社會。
