打开电视，各类广告随之来袭。除咗系宣传大湾区嘅发展机遇有几好，与及忠告「借钱梗要还，咪俾钱中介」之外，最多就系护肤养颜、美容化妆、逆龄抗老之类嘅商品。听讲最近仲有一种风闻可以修复破损DNA（人体基因）嘅NMN产品，有什么延缓衰老、激活青春嘅功效。只不过，就算你相信，呢啲相对昂贵嘅保健食品，都唔系人人可以畀钱尝试。
唔少人听见「老去」都会避而不谈。「唔好问我几多岁啦，年年都系廿八！」「老」，究竟有几令人抗拒呢？你是否例外？今年初，我终于攞到绿卡，唔系移民外国嗰种，而系可以用「两蚊」全港通行嘅乘车证。交通费负担大减，原来真系「好过瘾」。由荃湾屋企往返杏花邨做嘢，加埋转车，都唔使十蚊。唔单止出行变得更爽，而系人嘅心情都变得开心咗。
然而，人变老，就或多或少谂返旧时。今年刚好系自己小学毕业五十年，足足有半个世纪，而大学毕业又啱啱好四十年。加上忽然间，一啲唔多见面嘅新知旧友，都话要离开呢个愈嚟愈陌生嘅地方，送行饭局总会倾到少年往事。近日有人post出小学毕业相，想认番啲旧同学。看相中人，疑幻疑真，惊觉青春少艾嘅书友仔已经「登陆」，有啲人连名字都记唔起。
我哋都锺意回忆。难怪有人话，当我哋开始讲「想当年」，就代表我哋真正老啦！人生漫长，总会有高山低谷、成功满足、受伤别离等嘅经历。而我哋经常记起嘅，系苦毒抑或系欢愉呢？渐渐老去嘅其中一项功课，就系透过追忆，将自己人生各个片段慢慢整理归类。过去嘅零碎故事，如果能有人聆听，经过重组理解，被赋予新嘅意义，人生会变得整全无憾。
最近同太太听讲座，老师话长者面对老去，需要嘅除咗系物质生活保障、药物治疗病痛之外，心灵嘅需要经常被忽略。原来生命中嘅离别、偶遇、建立、苦痛，各有意义，编织起一个独特嘅我。几年前，因为喺牧职服侍嘅时候遇到冲击心灵嘅创伤事件，要停低休息，就喺几次个人退省嘅时候写呀写（写生命札记），透过书写回顾过去而渐渐得到疗愈。我开始识得原谅自己，也终于对过去多年来一啲难以言喻嘅心结放手。
当自己将唔同嘅人生片段，苦与乐、得与失、拆毁与建立，赞誉与诋毁，放喺自己嘅人生图画之内，就开始发现上主喺自己生命中嘅计划。旧约圣经里面嘅约瑟，幼年被兄长卖到埃及为奴，孤苦伶仃，仲坐埋监，人生坎坷可想而知。不过，约瑟坚守倚靠上主，最后得到埃及法老王嘅赏识，高升为宰相。兄弟后来去埃及买粮食，约瑟同佢哋讲：「你哋原本计划要对付我，但上主为咗好多人嘅好处，使用咗你哋嘅计划，你哋睇到喇！」（创五十20，笔者意译）
重构人生故事，就更体会自我嘅完整性，呢个就系知名心理学家艾瑞克森（Erik H. Erikson）描述正常人生嘅社会心理发展最后阶段。人步入晚年，回顾人生，多多少少会追忆自己嘅过去。喺呢段日子，佢哋会谂下自己一生嘅成就。如果佢哋认为自己过往嘅生活「成功」，就会培养到一份自我整全（ego integrity）嘅意识，会确认生命嘅意义。当佢哋接近生命嘅尽头，更有可能对死亡感到平静。相反，如果仍然被悔恨、绝望缠绕，通常会出现抑郁同埋绝望嘅感觉，而佢哋亦可能觉得生活唔公平，害怕死亡。
重组自己人生板块，重新拥有自己作为导演同主角嘅生活，就更识得体会上一代喺自己生命中留下嘅足印。我依家最珍惜嘅，就系每晚同老妈子倾几句电话，一点一滴，畀佢讲吓前尘往事，我又做啲wrap up。哪怕每晚有时佢讲嘅，都系「你食咗饭未呀？听日返工去边度？唔好咁辛苦呀！做埋啲嘢早啲去瞓。」喺老妈子心中，六十岁嘅孩子永远都系孩子。而我，正体会自我整全嘅满足。
变老，我早已经接受咗，仲感到一丝丝幸福呢！
「生活喺神里面嘅人好掂，佢哋好似种喺上主庭院里面嘅棕树同埋香柏树咁旺盛。就算佢哋啲头发白晒，仍然充满活力，果实纍纍。劲呀！咁就睇得出上主系正直嘅，佢真系我哋嘅靠山！」（诗九十二12-15，笔者意译）
（为支持广东话，文章试用广东话加通俗俚语书写，请勿见怪。）
守护自由空间，请支持基督教《时代论坛》
可选择：📲 PayMe 或 💳 网上捐款（信用卡）或
⚡️转数快FPS +852 51100803（注明奉献，如需收据请附姓名及电话）
