据统计处二〇一六年十月嘅数据显示，全港十八区中，有八区的贫穷率高于全港平均数，最贫穷仍然系深水埗，其次系观塘同黄大仙区，排第四嘅系连升四位嘅元朗，西贡则继续成为贫穷率最低嘅地区。
近年有好多唔同嘅团体都开始做一啲有关贫穷议题嘅体验活动同探访行动，听到啲同行有时会讲，啲团体搵佢地去搞探访搞体验，好多时都要求要去深水埗，一定要有去深水埗嘅元素。
我地曾经遇到有间传媒要采访贫校嘅工作，佢地想影我地一啲体验活动，同时亦系强调问我地可唔可以喺深水埗拍摄，于是我同佢讲：「点解一定要去深水埗呢？体验性质嘅活动系唔需要特选地区播，其实喺唔同嘅旧区都有呈现基层嘅生活形态。」跟住佢回覆我因为冇深水埗元素，所以取消拍摄，当时我真系好劳气，因为要安排学生又要通知家长、老师同校长，劳师动众，最后竟然话唔啱佢地要求，于是我话要投诉个编辑，要向我地解释，最后佢地死死气要拍左佢。
呢啲现象嘅出现我反而想问一句，乜香港得一个社区系贫穷咩？点解个个都要走去深水埗嘅呢？唔通我地一落去就会感受到嗰股贫穷嘅气场？虽然按统计数据嚟讲，深水埗区的确喺香港暂时系最贫穷嘅地区，但系其实喺十八个区域里面，都有佢地独特的贫穷问题，更何况，低收入工种嘅基层劳动群体，佢地工作嘅地区可能系游走于不同嘅区域，土瓜湾有受重建影响嘅劏房户居民，北角亦有好多新移民寄居，葵涌也有为数不少嘅基层南亚族群聚居等等。不过若果我咁讲，亦可能落入一个陷阱，就系将基层街坊嘅生命同生活当作动物园咁去参观同鑑赏，其实深水埗嘅「贫穷观赏度」长年持续高企，原因有可能系透过数据统计，传媒积极嘅报道，以及市民嘅耳濡目染下建构出嚟嘅，亦正正佢嘅曝光率比其他区较高，造成其他区嘅贫穷问题有可能不被重视。
而住喺深水埗嘅基层街坊亦有可能因为社会嘅渲染下，认为自己身处嘅地方确系最贫穷，连自己都认同系极需要支援，就好似派饭派物资呢啲服务，喺深水埗系特别多，曾经收过无数次嘅来电：
有二手衫捐：「啲衫都唔着，仲几新净架，咪捐俾啲基层家庭罗！」（有冇问过啲街坊想唔想着你啲旧衫？）
有二手电器要送：「趁屋企买左部新高清电视，咪将个旧嘅捐出去，睇下深水埗啲人要唔要罗！」（点解一定系深水埗？香港净系得深水埗系贫穷集中地？）
有饮宴食物剩左：「哗，好嘥呀，等我埋一齐拎去通州街桥底先！」（又去深水埗，一动慈心就谂去深水埗，真系多得传媒积极去深水埗报道嘅工作。）
黄洪老师《「无穷」的盼望》一书中有一个调查，系访问基层群体点样睇何谓贫穷，其中一个回答：「贫穷就系要用别人用过嘅二手嘢……」。睇下，我地嘅社会唔单止教导我地唔好嘥嘢，仲教我地啲垃圾同唔要嘅嘢记得要搵街坊接收，而一班街坊喺缺乏教育底下被我地塑造到用二手嘢系好有意义嘅，佢地竟然成为废物循环供应链中其中一重要成员……
深水埗嘅贫穷论有可能系由你我他建构出嚟嘅，就好似「贫穷」呢两个字，同样地都系我地成日用嚟称呼一班街坊，又或者去做社会服务时成日挂喺口边去分享感受同祷告嗰阵时常用嘅标签字眼。
（作者为关怀贫穷学校生命教育主任）
