據統計處二〇一六年十月嘅數據顯示，全港十八區中，有八區的貧窮率高於全港平均數，最貧窮仍然係深水埗，其次係觀塘同黃大仙區，排第四嘅係連升四位嘅元朗，西貢則繼續成為貧窮率最低嘅地區。
近年有好多唔同嘅團體都開始做一啲有關貧窮議題嘅體驗活動同探訪行動，聽到啲同行有時會講，啲團體搵佢地去搞探訪搞體驗，好多時都要求要去深水埗，一定要有去深水埗嘅元素。
我地曾經遇到有間傳媒要採訪貧校嘅工作，佢地想影我地一啲體驗活動，同時亦係強調問我地可唔可以喺深水埗拍攝，於是我同佢講：「點解一定要去深水埗呢？體驗性質嘅活動係唔需要特選地區播，其實喺唔同嘅舊區都有呈現基層嘅生活形態。」跟住佢回覆我因為冇深水埗元素，所以取消拍攝，當時我真係好勞氣，因為要安排學生又要通知家長、老師同校長，勞師動眾，最後竟然話唔啱佢地要求，於是我話要投訴個編輯，要向我地解釋，最後佢地死死氣要拍左佢。
呢啲現象嘅出現我反而想問一句，乜香港得一個社區係貧窮咩？點解個個都要走去深水埗嘅呢？唔通我地一落去就會感受到嗰股貧窮嘅氣場？雖然按統計數據嚟講，深水埗區的確喺香港暫時係最貧窮嘅地區，但係其實喺十八個區域裡面，都有佢地獨特的貧窮問題，更何況，低收入工種嘅基層勞動群體，佢地工作嘅地區可能係游走於不同嘅區域，土瓜灣有受重建影響嘅劏房戶居民，北角亦有好多新移民寄居，葵涌也有為數不少嘅基層南亞族群聚居等等。不過若果我咁講，亦可能落入一個陷阱，就係將基層街坊嘅生命同生活當作動物園咁去參觀同鑑賞，其實深水埗嘅「貧窮觀賞度」長年持續高企，原因有可能係透過數據統計，傳媒積極嘅報道，以及市民嘅耳濡目染下建構出嚟嘅，亦正正佢嘅曝光率比其他區較高，造成其他區嘅貧窮問題有可能不被重視。
而住喺深水埗嘅基層街坊亦有可能因為社會嘅渲染下，認為自己身處嘅地方確係最貧窮，連自己都認同係極需要支援，就好似派飯派物資呢啲服務，喺深水埗係特別多，曾經收過無數次嘅來電：
有二手衫捐：「啲衫都唔著，仲幾新淨架，咪捐俾啲基層家庭囉！」（有冇問過啲街坊想唔想著你啲舊衫？）
有二手電器要送：「趁屋企買左部新高清電視，咪將個舊嘅捐出去，睇下深水埗啲人要唔要囉！」（點解一定係深水埗？香港淨係得深水埗係貧窮集中地？）
有飲宴食物剩左：「嘩，好嘥呀，等我埋一齊拎去通州街橋底先！」（又去深水埗，一動慈心就諗去深水埗，真係多得傳媒積極去深水埗報道嘅工作。）
黃洪老師《「無窮」的盼望》一書中有一個調查，係訪問基層群體點樣睇何謂貧窮，其中一個回答：「貧窮就係要用別人用過嘅二手嘢……」。睇下，我地嘅社會唔單止教導我地唔好嘥嘢，仲教我地啲垃圾同唔要嘅嘢記得要搵街坊接收，而一班街坊喺缺乏教育底下被我地塑造到用二手嘢係好有意義嘅，佢地竟然成為廢物循環供應鏈中其中一重要成員……
深水埗嘅貧窮論有可能係由你我他建構出嚟嘅，就好似「貧窮」呢兩個字，同樣地都係我地成日用嚟稱呼一班街坊，又或者去做社會服務時成日掛喺口邊去分享感受同禱告嗰陣時常用嘅標籤字眼。
（作者為關懷貧窮學校生命教育主任）
