带左班同学仔去拾荒体验，代入长者工作嘅处境。活动后俾同学仔分享番啲感受，有一组嘅经历特别深刻，佢地讲番俾我听，头先喺执纸皮过程遇到一位八十多岁嘅婆婆，佢正喺到度忙紧整理啲纸皮。同学仔谂住帮佢手，婆婆就唔多理佢地，当佢地谂住走嘅时候有个同学仔发现自己个衫袖有血，喺到谂唔通自己受左伤？跟住睇下自己个身有冇流血，又冇噃！ 有个同学仔就回望睇下佢地接触过嘅婆婆，原来啲血系婆婆架！婆婆只手到有个小伤口，啲血一直流，流到落只脚到，但婆婆冇理会个伤口，仍然埋首喺佢堆纸皮度。同学仔拿拿临话俾佢知，同埋忍唔住拎啲纸巾出嚟帮婆婆止血。婆婆其实直到同学仔拎出纸巾前都唔知自己受左伤，到知道嘅时候就讲自己啲皮好厚好硬净，冇咁易伤咁话。
问番同学仔见到婆婆只手流血呢件事有咩感受，佢地都觉得好唔开心，忙碌嘅拾荒工作令到婆婆都唔为意自己受左伤，咁大年纪真系唔应该咁操劳。而其中有位同学仔，拎住张纸巾喺双眼附近度游走，眼睛通红……似乎喺我地一路讲紧婆婆件事啲时候，佢一直听住已经流紧眼泪，都喊左一段时间……佢嘅眼泪仲滴湿左喺佢写感受嘅嗰张纸到……喺一阵愕然嘅气氛中，想邀请佢讲下感受，同学仔摇头表达唔想，想继续以眼泪去表达自己嘅感受……
当时唔知道亦唔敢肯定同学仔系唔系为左婆婆嘅受伤而流泪（完了活动后问番证实左同学仔系为到婆婆流泪嘅……），不过喺最尾嗰阵想尝试鼓励番同学仔，做左一个总结，分享俾佢地知过往喺好多次体验活动里面，都有同学仔曾经为佢地遇见过嘅拾荒长者而流下眼泪，为到佢地嘅处境感到难受，唔明白社会点解冇照顾到呢班长者，俾嗰少少津贴其实不足以令长者可以安稳生活，仍要为馀生奔波。通常我地都特别嘅向流泪嘅参与者表达欣赏同多谢，好多谢佢地将街坊放喺心里面，好多谢佢地以眼泪表达佢地对街坊心同感受嘅景况，点解呢？
我地香港人好耐好耐都冇为到香港嘅社会问题，贫穷嘅状况，以及基层街坊面对困难嘅处境而流泪，因为我地喺呢个社会惯左理性接受社会问题，会谂政策谂分配资源去解决佢，用数据嚟评估种种问题嘅严重性，我地被训练到要习惯理智去处理呢啲情况，都好正常嘅。不过咁样嘅想法令我地嘅同理心被埋没左，唔能够感性去触摸面对问题嘅街坊佢嘅感受，佢地嘅状况冇连结到我地嘅慈心，佢地所受压迫同排斥因为理性令我地感受唔到。能够为街坊流出同理心嘅眼泪实在系好难得，呢个世代好需要更多懂得为社会问题流泪嘅人，让我地从知性嘅层面走入进深嘅层次，以情理兼融嘅态度去解决问题，比官僚嘅行政主导管理更有人性，社会将会更有同理心。
昔日耶稣流出宝血舍命为我地洗去罪孽，触动基督徒以生命去回应这份爱嘅救赎，今日婆婆呢道伤痕嘅血流，换回呢个冷漠社会一个初心，恢复一份对人嘅重视同着紧，对生命嘅一份反思同尊重，希望有更多嘅人能够好似呢位同学仔嘅经历咁样，有多一份对贫穷嘅触动，流下同理嘅眼泪，冲洗呢度嘅冷漠，以爱润泽我城，连结众人生命。
（作者为关怀贫穷学校生命教育主任）
