帶左班同學仔去拾荒體驗，代入長者工作嘅處境。活動後俾同學仔分享番啲感受，有一組嘅經歷特別深刻，佢地講番俾我聽，頭先喺執紙皮過程遇到一位八十多歲嘅婆婆，佢正喺到度忙緊整理啲紙皮。同學仔諗住幫佢手，婆婆就唔多理佢地，當佢地諗住走嘅時候有個同學仔發現自己個衫袖有血，喺到諗唔通自己受左傷？跟住睇下自己個身有冇流血，又冇噃！ 有個同學仔就回望睇下佢地接觸過嘅婆婆，原來啲血係婆婆架！婆婆隻手到有個小傷口，啲血一直流，流到落隻腳到，但婆婆冇理會個傷口，仍然埋首喺佢堆紙皮度。同學仔拿拿臨話俾佢知，同埋忍唔住拎啲紙巾出嚟幫婆婆止血。婆婆其實直到同學仔拎出紙巾前都唔知自己受左傷，到知道嘅時候就講自己啲皮好厚好硬淨，冇咁易傷咁話。
問番同學仔見到婆婆隻手流血呢件事有咩感受，佢地都覺得好唔開心，忙碌嘅拾荒工作令到婆婆都唔為意自己受左傷，咁大年紀真係唔應該咁操勞。而其中有位同學仔，拎住張紙巾喺雙眼附近度遊走，眼睛通紅……似乎喺我地一路講緊婆婆件事啲時候，佢一直聽住已經流緊眼淚，都喊左一段時間……佢嘅眼淚仲滴濕左喺佢寫感受嘅嗰張紙到……喺一陣愕然嘅氣氛中，想邀請佢講下感受，同學仔搖頭表達唔想，想繼續以眼淚去表達自己嘅感受……
當時唔知道亦唔敢肯定同學仔係唔係為左婆婆嘅受傷而流淚（完了活動後問番證實左同學仔係為到婆婆流淚嘅……），不過喺最尾嗰陣想嘗試鼓勵番同學仔，做左一個總結，分享俾佢地知過往喺好多次體驗活動裡面，都有同學仔曾經為佢地遇見過嘅拾荒長者而流下眼淚，為到佢地嘅處境感到難受，唔明白社會點解冇照顧到呢班長者，俾嗰少少津貼其實不足以令長者可以安穩生活，仍要為餘生奔波。通常我地都特別嘅向流淚嘅參與者表達欣賞同多謝，好多謝佢地將街坊放喺心裡面，好多謝佢地以眼淚表達佢地對街坊心同感受嘅景況，點解呢？
我地香港人好耐好耐都冇為到香港嘅社會問題，貧窮嘅狀況，以及基層街坊面對困難嘅處境而流淚，因為我地喺呢個社會慣左理性接受社會問題，會諗政策諗分配資源去解決佢，用數據嚟評估種種問題嘅嚴重性，我地被訓練到要習慣理智去處理呢啲情況，都好正常嘅。不過咁樣嘅想法令我地嘅同理心被埋沒左，唔能夠感性去觸摸面對問題嘅街坊佢嘅感受，佢地嘅狀況冇連結到我地嘅慈心，佢地所受壓迫同排斥因為理性令我地感受唔到。能夠為街坊流出同理心嘅眼淚實在係好難得，呢個世代好需要更多懂得為社會問題流淚嘅人，讓我地從知性嘅層面走入進深嘅層次，以情理兼融嘅態度去解決問題，比官僚嘅行政主導管理更有人性，社會將會更有同理心。
昔日耶穌流出寶血捨命為我地洗去罪孽，觸動基督徒以生命去回應這份愛嘅救贖，今日婆婆呢道傷痕嘅血流，換回呢個冷漠社會一個初心，恢復一份對人嘅重視同著緊，對生命嘅一份反思同尊重，希望有更多嘅人能夠好似呢位同學仔嘅經歷咁樣，有多一份對貧窮嘅觸動，流下同理嘅眼淚，沖洗呢度嘅冷漠，以愛潤澤我城，連結眾人生命。
（作者為關懷貧窮學校生命教育主任）
