呢几日去左好几间中学，同同学仔讲解有关五一会进行嘅一个行动，分享番落区接触街坊嘅处境同生活，预备佢地可以有能力同街坊对话，呢啲准备功夫就不在话下。不过，其实最重点系我地去问啲同学仔一样嘢：「究竟点解要喺劳动节去关心街坊呢？」当我地向同学仔问呢个问题时，其实又带出另外一个问题：「点解会有劳动节呢个节日呢？个起源喺边到嚟呢？」我尝试整合番同学仔嘅回应：
「五一黄金周，俾啲大陆人落嚟shopping……」（好明显受传媒嘅讯息影响）
「可以放假罗！」（好明显hea紧我）
「我知！多谢劳工阶层，同佢地庆祝！」（跟住我问番：「既然要庆祝，咁点解仲有咁多劳工阶层都冇得放假嘅？」）
「因为啲劳工好惨，好似而家香港咁，所以要你记住有佢地存在，要关注佢地。」（算有啲sense，但系仍未讲倒重点。）
而佢地对劳动节嘅起源更加系百份之一百唔知道。其实番学咁多年放左咁多次劳动节假期，可能学校都冇话过俾佢地知。咁点解要放，就更加唔会有同学仔花时间了解，总知有假放就得啦，唔使返学先至系重点，了解劳动节嘅起源可能喺佢地眼中系错左重点！！所以我地透过提问式嘅讨论交流，得到少少嘅结论：同学仔共识节日有两种目的，一种系庆祝一啲野，而另一种系记念一啲野。当讲到呢到，佢地就明白系记念一啲事，话梗系啲劳工受到唔公平嘅对待啦，要争取权益。我再追问：「点解会谂倒系争取权益嘅记念？」同学仔讲：「梗系关权益事啦，你睇下而家香港就知啦，啲打工仔人工冇增加过仲跌左，啲清洁工呀，外判呀又减成本低工资，做低下阶层咁多年以嚟都系被剥削架啦！生活边有好过啫！」
明眼嘅同学仔挑起左条筋之后彷佛看透世情咁样，其实佢地好知道香港发生紧乜嘢事，只系感到无力同埋会谂：「我又可以做倒啲咩呢？只系一个细路……」劳动节记念嘅正正就系有关劳工争取权益嘅事。喺一八八四年，工业革命嘅年代，美国工厂商人要求劳工增加工时，提升生产力，令到工人作业时间过长，工人有感于每日工作劳苦，希望资方可以改善待遇，于是发起「三八制」运动；即系向资本家要求每日工作八小时，私人馀閒八小时，休息八小时。喺一八八六年五月一日举行大罢工，参加示威运动者多达二十万人。掌权者视呢次示威运动为暴动行为，警方以武力镇压示威者，致不幸酿成流血惨案，多人死伤。为左纪念呢段壮烈嘅历史，喺巴黎举行嘅第二次国际成立大会通过决议，将五月一日定为国际劳工节，要求各国嘅劳工共同努力，为八小时工作日而奋斗。
睇番呢个三八制运动嘅历史，再睇番而家香港，虽然我地嘅工业已经渐渐息微，换嚟嘅系知识型经济、服务业、金融业嘅蓬勃，精英主义同专业认证令城市更文明更昌盛（官方系咁讲，虽然我唔认同），话就话每日工作八小时，但另外嘅十六小时，劳工阶层系唔系真系可以享有八小时馀閒同八小时嘅休息时间呢？相信大家都有目共睹，拾荒婆婆由朝早六点做到夜晚八点，有时仲唔敢返屋企喺啲纸皮侧边到训过夜，惊俾人偷左啲生计；外判清洁工由于工资一直都低过政府直接聘请嘅工友，为左生计，好多都要打两份工，八加八可能工作系十六小时都未定。好多外判制度下嘅工作都呈现紧十八世纪工业时代嘅剥削，虽然未必系奴役你，要你工作好多个钟头，不过喺一啲合约上嘅细节、假期加班工资嘅计算、工作嘅处境剥削，以及人神共愤嘅强积金对冲，呢种倾斜资方利益嘅措施，都彷如一种种机关算尽，想悭得就悭，隐藏性地剥削劳工嘅权益，乘基层缺乏对权利嘅认知去图利赚到尽。
劳动节可能喺好多人心目中系一个难得嘅假期可以休息，而将劳工争取权益嘅历史遗忘得一干二净。但呢种奴役劳工、剥削权益嘅苦痛历史，仍然喺世界每一个角落，借着全球化、官商同谋、极权经济主义，以及外判包销制度等共同嘅协作下，结构性地无休无止去欺压基层劳动群体。
唔想咁复杂，就简单啲去谂，劳动节我地有得放假，但点解好多基层劳工阶层都冇得放，又话劳动节系属于佢地嘅？咁我地又系唔系一种凉薄嘅记念呢？
（作者为关怀贫穷学校生命教育主任）
