呢幾日去左好幾間中學，同同學仔講解有關五一會進行嘅一個行動，分享番落區接觸街坊嘅處境同生活，預備佢地可以有能力同街坊對話，呢啲準備功夫就不在話下。不過，其實最重點係我地去問啲同學仔一樣嘢：「究竟點解要喺勞動節去關心街坊呢？」當我地向同學仔問呢個問題時，其實又帶出另外一個問題：「點解會有勞動節呢個節日呢？個起源喺邊到嚟呢？」我嘗試整合番同學仔嘅回應：
「五一黃金週，俾啲大陸人落嚟shopping……」（好明顯受傳媒嘅訊息影響）
「可以放假囉！」（好明顯hea緊我）
「我知！多謝勞工階層，同佢地慶祝！」（跟住我問番：「既然要慶祝，咁點解仲有咁多勞工階層都冇得放假嘅？」）
「因為啲勞工好慘，好似而家香港咁，所以要你記住有佢地存在，要關注佢地。」（算有啲sense，但係仍未講倒重點。）
而佢地對勞動節嘅起源更加係百份之一百唔知道。其實番學咁多年放左咁多次勞動節假期，可能學校都冇話過俾佢地知。咁點解要放，就更加唔會有同學仔花時間了解，總知有假放就得啦，唔使返學先至係重點，了解勞動節嘅起源可能喺佢地眼中係錯左重點！！所以我地透過提問式嘅討論交流，得到少少嘅結論：同學仔共識節日有兩種目的，一種係慶祝一啲野，而另一種係記念一啲野。當講到呢到，佢地就明白係記念一啲事，話梗係啲勞工受到唔公平嘅對待啦，要爭取權益。我再追問：「點解會諗倒係爭取權益嘅記念？」同學仔講：「梗係關權益事啦，你睇下而家香港就知啦，啲打工仔人工冇增加過仲跌左，啲清潔工呀，外判呀又減成本低工資，做低下階層咁多年以嚟都係被剝削架啦！生活邊有好過啫！」
明眼嘅同學仔挑起左條筋之後彷彿看透世情咁樣，其實佢地好知道香港發生緊乜嘢事，只係感到無力同埋會諗：「我又可以做倒啲咩呢？只係一個細路……」勞動節記念嘅正正就係有關勞工爭取權益嘅事。喺一八八四年，工業革命嘅年代，美國工廠商人要求勞工增加工時，提升生產力，令到工人作業時間過長，工人有感於每日工作勞苦，希望資方可以改善待遇，於是發起「三八制」運動；即係向資本家要求每日工作八小時，私人餘閒八小時，休息八小時。喺一八八六年五月一日舉行大罷工，參加示威運動者多達二十萬人。掌權者視呢次示威運動為暴動行為，警方以武力鎮壓示威者，致不幸釀成流血慘案，多人死傷。為左紀念呢段壯烈嘅歷史，喺巴黎舉行嘅第二次國際成立大會通過決議，將五月一日定為國際勞工節，要求各國嘅勞工共同努力，為八小時工作日而奮鬥。
睇番呢個三八制運動嘅歷史，再睇番而家香港，雖然我地嘅工業已經漸漸息微，換嚟嘅係知識型經濟、服務業、金融業嘅蓬勃，精英主義同專業認證令城市更文明更昌盛（官方係咁講，雖然我唔認同），話就話每日工作八小時，但另外嘅十六小時，勞工階層係唔係真係可以享有八小時餘閒同八小時嘅休息時間呢？相信大家都有目共睹，拾荒婆婆由朝早六點做到夜晚八點，有時仲唔敢返屋企喺啲紙皮側邊到訓過夜，驚俾人偷左啲生計；外判清潔工由於工資一直都低過政府直接聘請嘅工友，為左生計，好多都要打兩份工，八加八可能工作係十六小時都未定。好多外判制度下嘅工作都呈現緊十八世紀工業時代嘅剝削，雖然未必係奴役你，要你工作好多個鐘頭，不過喺一啲合約上嘅細節、假期加班工資嘅計算、工作嘅處境剝削，以及人神共憤嘅強積金對沖，呢種傾斜資方利益嘅措施，都彷如一種種機關算盡，想慳得就慳，隱藏性地剝削勞工嘅權益，乘基層缺乏對權利嘅認知去圖利賺到盡。
勞動節可能喺好多人心目中係一個難得嘅假期可以休息，而將勞工爭取權益嘅歷史遺忘得一乾二淨。但呢種奴役勞工、剝削權益嘅苦痛歷史，仍然喺世界每一個角落，藉著全球化、官商同謀、極權經濟主義，以及外判包銷制度等共同嘅協作下，結構性地無休無止去欺壓基層勞動群體。
唔想咁複雜，就簡單啲去諗，勞動節我地有得放假，但點解好多基層勞工階層都冇得放，又話勞動節係屬於佢地嘅？咁我地又係唔係一種涼薄嘅記念呢？
（作者為關懷貧窮學校生命教育主任）
