咁多年喺做贫穷教育嘅过程都唔敢话一定有个绝对正确嘅方法去做就啱，仍然喺到摸索紧究竟点样先至系最对应到呢个议题嘅方式同内容。好似剩系课堂内嘅学习又惊离地，体验方式嘅活动有俾人话虐待细路，探访又好似喺到消费紧街坊，当佢地动物园咁睇，又好似有个社关课程主办团体剩系睇片，咁唔驶你带都得啦！所以喺谂嘅过程真系要好小心，以免事工陷喺扭曲筹办意义嘅漩涡里面。
呢一两年开始尝试除左以上都唔系最好嘅形式外，我地因为与一班街坊建立左一个较长嘅关系，同时间，街坊又知我地系做教育，知道我地嘅工作系想带人去认识多啲本地嘅基层处境，所以有时我地带啲同学仔去同佢地倾计，佢地都好乐意，仲话番俾我地知好有意义。过程中喺度谂，既然啲扶贫机构同压力团体成日讲充权，其实除左要让街坊了解自身被压迫嘅状况同争取权益外，其实每一个街坊喺社区里面都起紧好多唔同嘅化学作用，佢地嘅生活建构紧社区嘅脉络，塑造紧地方运作嘅节奏，无论对社区有冇贡献都好，佢地都喺到产生紧社区呢样嘢，佢地嘅人生阅历，生活经验同社交网络就系共同组成我地身处嘅城市。
要明白香港嘅贫穷问题同处境，其实认识佢地系其中一个学习关怀基层群体好重要嘅元素，于是乎，我地将一啲街坊名为社区老师。我地冇特别好似导赏团或某啲议题咁去训练佢地成为一个专门嘅导师，而我地认为佢地喺社区嘅生活经验已经系一种活生生嘅教材，唔需要添加任何我地嘅知识或权威嘅内容，只要将佢地嘅人生经历同率性，呈现喺学习者嘅面前，已经系一个相当震撼嘅教学方法。
（作者提供图片）
有个露宿嘅街坊成为左我地嘅社区老师。有次喺真人图书馆形式下，一位同学仔问街坊觉得政府而家对应无家者需要所推行嘅政策足唔足够。街坊答番佢政府根本唔当佢地系人，只当佢地系垃圾，呢句说话若果出喺我地嘅口中或者会认为好主观，你做扶贫梗系帮基层啦；但当事人嘅心声，令同学仔打开了另一个向度去看世界，多左一份同理心，生命承载嘅能力有好似厚实左啲。又记得有次邀请一位妇女做老师，佢嘅反应系「我何德何能呢？」有啲受宠若惊之感，因为佢认为老师系要读好多书识好多嘢，系好专业嘅角色，佢学历唔高，觉得点配得上做老师呢？我同位妇女讲千祈唔好睇小自己嘅生活经验，你嘅分享绝对可以帮到学习者认识你地嘅生活同社会嘅状况，系读咁多年书都未必学得到架！呢句又真系好真实，因为我地带啲大学生又或者社工落区听街坊讲嘢，佢地好似从来未听过呢类型嘅题目同分享咁，你话街坊成为社区老师系唔系实至名归呢？
我地成日讲有教无类，其实唔单止我地去教嘅对象无分能力高低一样用心去教之外，其实亦无分有冇读过啲咩先可以去教嘅老师，喺唔同嘅範畴都有其专门嘅参与者，借住认识社区同草根阶层生活呢个层面，街坊都可以成为我地众人嘅社区老师。
延伸阅读反思：
1. http://hottopic.chinatimes.com/20160330004691-260809
