咁多年喺做貧窮教育嘅過程都唔敢話一定有個絕對正確嘅方法去做就啱，仍然喺到摸索緊究竟點樣先至係最對應到呢個議題嘅方式同內容。好似剩係課堂內嘅學習又驚離地，體驗方式嘅活動有俾人話虐待細路，探訪又好似喺到消費緊街坊，當佢地動物園咁睇，又好似有個社關課程主辦團體剩係睇片，咁唔駛你帶都得啦！所以喺諗嘅過程真係要好小心，以免事工陷喺扭曲籌辦意義嘅漩渦裡面。
呢一兩年開始嘗試除左以上都唔係最好嘅形式外，我地因為與一班街坊建立左一個較長嘅關係，同時間，街坊又知我地係做教育，知道我地嘅工作係想帶人去認識多啲本地嘅基層處境，所以有時我地帶啲同學仔去同佢地傾計，佢地都好樂意，仲話番俾我地知好有意義。過程中喺度諗，既然啲扶貧機構同壓力團體成日講充權，其實除左要讓街坊了解自身被壓迫嘅狀況同爭取權益外，其實每一個街坊喺社區裡面都起緊好多唔同嘅化學作用，佢地嘅生活建構緊社區嘅脈絡，塑造緊地方運作嘅節奏，無論對社區有冇貢獻都好，佢地都喺到產生緊社區呢樣嘢，佢地嘅人生閱歷，生活經驗同社交網絡就係共同組成我地身處嘅城市。
要明白香港嘅貧窮問題同處境，其實認識佢地係其中一個學習關懷基層群體好重要嘅元素，於是乎，我地將一啲街坊名為社區老師。我地冇特別好似導賞團或某啲議題咁去訓練佢地成為一個專門嘅導師，而我地認為佢地喺社區嘅生活經驗已經係一種活生生嘅教材，唔需要添加任何我地嘅知識或權威嘅內容，只要將佢地嘅人生經歷同率性，呈現喺學習者嘅面前，已經係一個相當震撼嘅教學方法。
（作者提供圖片）
有個露宿嘅街坊成為左我地嘅社區老師。有次喺真人圖書館形式下，一位同學仔問街坊覺得政府而家對應無家者需要所推行嘅政策足唔足夠。街坊答番佢政府根本唔當佢地係人，只當佢地係垃圾，呢句說話若果出喺我地嘅口中或者會認為好主觀，你做扶貧梗係幫基層啦；但當事人嘅心聲，令同學仔打開了另一個向度去看世界，多左一份同理心，生命承載嘅能力有好似厚實左啲。又記得有次邀請一位婦女做老師，佢嘅反應係「我何德何能呢？」有啲受寵若驚之感，因為佢認為老師係要讀好多書識好多嘢，係好專業嘅角色，佢學歷唔高，覺得點配得上做老師呢？我同位婦女講千祈唔好睇小自己嘅生活經驗，你嘅分享絕對可以幫到學習者認識你地嘅生活同社會嘅狀況，係讀咁多年書都未必學得到架！呢句又真係好真實，因為我地帶啲大學生又或者社工落區聽街坊講嘢，佢地好似從來未聽過呢類型嘅題目同分享咁，你話街坊成為社區老師係唔係實至名歸呢？
我地成日講有教無類，其實唔單止我地去教嘅對象無分能力高低一樣用心去教之外，其實亦無分有冇讀過啲咩先可以去教嘅老師，喺唔同嘅範疇都有其專門嘅參與者，藉住認識社區同草根階層生活呢個層面，街坊都可以成為我地眾人嘅社區老師。
延伸閱讀反思：
1. http://hottopic.chinatimes.com/20160330004691-260809
