相信大家近期会留意嘅一部电影——我，不低头（I, Daniel Blake），开头见到个戏名唔明点解要将个我同其他字分开，睇左先知道原来独立一个我字系有意思，当然，呢个系我个人嘅睇法，唔代表佢地系有咁嘅意思，呢个我唔系一个自我嘅我，而系一个有尊严嘅我（自己）。喺社会无论咩人，不论贫富，都要活出一个有尊严嘅我。
通常你睇左呢套戏同朋友倾正常都会问你套戏好唔好睇，但系个人认为，呢套戏根本唔应该拍，点解？容许我讲一句："who cares？"……唔系话呢套戏拍得唔好唔应该拍，而系因为拍得太真实、太震撼……然后咁又点？喺戏里面去帮主角嘅嗰班人，同埋买飞入场嘅嗰班，有边个会理会？……
有边个会理佢地啫？……戏一开头就系男主角Daniel喺申请福利津贴嘅行政手续中出现嘅情绪，一种令人极洩气嘅无感情式盘问手法，令申请福利者极尽缠磨，负责处理申请嘅专员就好似一部已set定好晒程序嘅人肉录音机，呢一种去人性化嘅处理目的只有一个，就系完成呢个工序同申请。喺香港攞综援攞津贴嘅街坊又咪系一样咁缠磨！街坊每次上去社署所面对嘅程序，手续同等候，都系承载紧社会对佢嘅睇法同身份嘅认同，唔通每个基层嘅街坊都系好想攞福利？唔系话申请津贴系件好邪恶嘅事，而系喺呢一类自我主义型嘅社会冇人想去倚赖人。有边个会理会佢地申请时会面对嘅压力同内心嘅感受？Who cares?
睇左嘅人讲套戏会令人喊，结果睇左真系喊，喊唔系因为拍嘅情节好触动，而系喺现实生活真系见过，当女主角因为冇钱，有好多日都冇食嘢，但都宁愿喂饱咗两个细路先，然后要去食物银行攞食物。当攞紧罐头嘅时候，我真系不为意女主角竟然攞咗罐袋喺袋嘅罐头出嚟，揭起个盖即刻食嗰啲罐头焗豆……嗰种饿到抽筋，失去理性嘅举动睇到我「拿住拿住」。我好快喊左出嚟，因为喺现实生活里面，真系有个妇女，虽然佢唔系喺食物银行攞啲罐头即刻食，而系佢屋企冇晒嘢食，手上只得四十蚊，佢走去食物银行，喊住将四十蚊俾个姑娘，然后跪喺佢面前求姑娘俾食物佢……现实发生左，咁又点，who cares?
抗争系好令人反感嘅，主角每一次嘅激动同疑问，对制度嘅不满产生嘅愤怒，不断喺过程中升级，但系，有边个会理佢？处理程序嘅人要行政完美，要零情感、零错误，冇错架！样样都要讲程序，点会理会被压迫嘅感受呢，Daniel，呢啲只系你嘅问题炸，基层，返去检讨下你嘅情绪啦，克制下啦！现实中嘅基层，佢地或者大部份唔会好似主角咁愤怒，但因为要被迫顺服喺呢种制度中，要认同呢种所谓文明理性嘅过程，要识喺呢个无情嘅社会做人，有多少不公嘅对待都要硬咽落喉咙到「括」一声吞左去，基层劳工如是，申请综援者如是，but，who cares?
最后，最讽刺嘅，系结尾Daniel 嘅丧礼，男主角喺争取申请津贴上诉过程中因心脏病发过身，女主角帮男主角办丧礼，丧礼开始嘅时候，女主角讲到：「我地要快啲开始呢个丧礼，多谢大家咁早出席，呢个时段系最平嘅亦系时间好短嘅，所以我地唯有用呢个时段……」，穷就系唔会有好嘅时段罗，穷就系连到死嗰刻都系最cheap罗，就系喺现实中就经历左两次，要两个街坊喺最平最快嘅情况下出殡，因为冇钱……连个棺都系要用最平嘅「纸」棺，系纸做嘅棺材，因为系最悭钱……
最后想讲，唔系做戏都真实发生过呢啲事，事关香港嘅制度同福利政策差唔多系英国嘅倒模，系殖民时期遗留落嚟嘅系统同意识形态。呢啲嘢发生过咁又点？可能大家会觉得本人系好悲观，但就系呢份无奈，呢份沉默嘅愤怒我好想表达出嚟，只可以用啲咁悲观嘅字眼表达出嚟，即使系写左出嚟，系表达左街坊嘅无奈，俾多啲人感受下佢地系点，好想睇到嘅人可以多啲关注，多啲同基层街坊同行，当然，呢个都只系一厢情愿，post左，过左一段时间，套戏又落埋画啦，戏里戏外嘅人如常生活，咁又点？有边个会理会Daniel 嘅遗言？有边个会想听佢嘅分享，佢只系想分享俾我地知佢只想成为一个可以拥有尊严嘅人，无分贫穷，无分富贵咁去做番一个有尊严嘅人，就系咁简单……but，who cares……
（作者为关怀贫穷学校生命教育主任）
