相信大家近期會留意嘅一部電影——我，不低頭（I, Daniel Blake），開頭見到個戲名唔明點解要將個我同其他字分開，睇左先知道原來獨立一個我字係有意思，當然，呢個係我個人嘅睇法，唔代表佢地係有咁嘅意思，呢個我唔係一個自我嘅我，而係一個有尊嚴嘅我（自己）。喺社會無論咩人，不論貧富，都要活出一個有尊嚴嘅我。
通常你睇左呢套戲同朋友傾正常都會問你套戲好唔好睇，但係個人認為，呢套戲根本唔應該拍，點解？容許我講一句："who cares？"……唔係話呢套戲拍得唔好唔應該拍，而係因為拍得太真實、太震撼……然後咁又點？喺戲裡面去幫主角嘅嗰班人，同埋買飛入場嘅嗰班，有邊個會理會？……
有邊個會理佢地啫？……戲一開頭就係男主角Daniel喺申請福利津貼嘅行政手續中出現嘅情緒，一種令人極洩氣嘅無感情式盤問手法，令申請福利者極盡纏磨，負責處理申請嘅專員就好似一部已set定好晒程序嘅人肉錄音機，呢一種去人性化嘅處理目的只有一個，就係完成呢個工序同申請。喺香港攞綜援攞津貼嘅街坊又咪係一樣咁纏磨！街坊每次上去社署所面對嘅程序，手續同等候，都係承載緊社會對佢嘅睇法同身份嘅認同，唔通每個基層嘅街坊都係好想攞福利？唔係話申請津貼係件好邪惡嘅事，而係喺呢一類自我主義型嘅社會冇人想去倚賴人。有邊個會理會佢地申請時會面對嘅壓力同內心嘅感受？Who cares?
睇左嘅人講套戲會令人喊，結果睇左真係喊，喊唔係因為拍嘅情節好觸動，而係喺現實生活真係見過，當女主角因為冇錢，有好多日都冇食嘢，但都寧願餵飽咗兩個細路先，然後要去食物銀行攞食物。當攞緊罐頭嘅時候，我真係不為意女主角竟然攞咗罐袋喺袋嘅罐頭出嚟，揭起個蓋即刻食嗰啲罐頭焗豆……嗰種餓到抽筋，失去理性嘅舉動睇到我「拿住拿住」。我好快喊左出嚟，因為喺現實生活裡面，真係有個婦女，雖然佢唔係喺食物銀行攞啲罐頭即刻食，而係佢屋企冇晒嘢食，手上只得四十蚊，佢走去食物銀行，喊住將四十蚊俾個姑娘，然後跪喺佢面前求姑娘俾食物佢……現實發生左，咁又點，who cares?
抗爭係好令人反感嘅，主角每一次嘅激動同疑問，對制度嘅不滿產生嘅憤怒，不斷喺過程中升級，但係，有邊個會理佢？處理程序嘅人要行政完美，要零情感、零錯誤，冇錯架！樣樣都要講程序，點會理會被壓迫嘅感受呢，Daniel，呢啲只係你嘅問題炸，基層，返去檢討下你嘅情緒啦，克制下啦！現實中嘅基層，佢地或者大部份唔會好似主角咁憤怒，但因為要被迫順服喺呢種制度中，要認同呢種所謂文明理性嘅過程，要識喺呢個無情嘅社會做人，有多少不公嘅對待都要硬咽落喉嚨到「括」一聲吞左去，基層勞工如是，申請綜援者如是，but，who cares?
最後，最諷刺嘅，係結尾Daniel 嘅喪禮，男主角喺爭取申請津貼上訴過程中因心臟病發過身，女主角幫男主角辦喪禮，喪禮開始嘅時候，女主角講到：「我地要快啲開始呢個喪禮，多謝大家咁早出席，呢個時段係最平嘅亦係時間好短嘅，所以我地唯有用呢個時段……」，窮就係唔會有好嘅時段囉，窮就係連到死嗰刻都係最cheap囉，就係喺現實中就經歷左兩次，要兩個街坊喺最平最快嘅情況下出殯，因為冇錢……連個棺都係要用最平嘅「紙」棺，係紙做嘅棺材，因為係最慳錢……
最後想講，唔係做戲都真實發生過呢啲事，事關香港嘅制度同福利政策差唔多係英國嘅倒模，係殖民時期遺留落嚟嘅系統同意識形態。呢啲嘢發生過咁又點？可能大家會覺得本人係好悲觀，但就係呢份無奈，呢份沉默嘅憤怒我好想表達出嚟，只可以用啲咁悲觀嘅字眼表達出嚟，即使係寫左出嚟，係表達左街坊嘅無奈，俾多啲人感受下佢地係點，好想睇到嘅人可以多啲關注，多啲同基層街坊同行，當然，呢個都只係一廂情願，post左，過左一段時間，套戲又落埋畫啦，戲裡戲外嘅人如常生活，咁又點？有邊個會理會Daniel 嘅遺言？有邊個會想聽佢嘅分享，佢只係想分享俾我地知佢只想成為一個可以擁有尊嚴嘅人，無分貧窮，無分富貴咁去做番一個有尊嚴嘅人，就係咁簡單……but，who cares……
（作者為關懷貧窮學校生命教育主任）
