琴日拎衫去隔離街洗衣鋪洗，遇到負責呢幾條街範圍清潔嘅戚大姐。
「輝仔，今日休息唔駛返工？」
『係呀！所以有時間咪拎啲衫去洗囉。』
「係嘅，我哋呢啲房仔連洗衣機都冇位擺，不過我就自己洗衫，吓吓拎出去洗真係好貴.....」
『我冇計啦！間房都冇窗，洗咗都唔知幾時乾.....』
「點解你唔租間有窗嘅？不過有窗啲租又唔係咁計啦！」
再問吓佢地有關假期嘅福利，原來做外判清潔工唔好話放復活節假，甚至有時連勞工假都冇得放齊，好似聖誕、元旦、農曆新年、佛誕同重陽都冇得放。戚大姐話唔好講呢啲節日假期，就算佢地最基本一個月四日嘅例假都放唔到，因為佢地呢行長期欠缺人手，好多時班工友都迫住冇得休息放假，繼續開工，不停係呢個外判制度中被奴役……
講到呢度，好多時好似戚大姐面對同樣處境嘅工友，佢地就會話知道自己呢班低下階層喺社會冇學識又冇文化，做得呢啲叫做乞兒工作就預咗有咁嘅待遇。我試過同基層工友講，復活節點解有咁多日假期，因為係記念耶穌受難，佢為我地釘十架，三日後復活，俾我地生命有活的盼望。
點知個工友同我講：「我地呢班窮人就真係日日都係受難節喇！你地聖誕又乜嘢復活節就有得放假，我地手停就口停呀！」
由耶穌降世，道成肉身，到最後被出賣、受辱，被釘上十架，除了成就救贖，祂在地上的一生還成就了甚麼？
而作為信徒，我們除了藉著耶穌的捨己，復活的憑證，因而可以上天堂之外，還能作甚麼？當耶穌口中說，貧窮人得好消息，被擄的得釋放，瞎眼的得看見，被壓迫的得自由，而上主的恩賜得著頌揚時，對我們信徒又代表著甚麼意思呢？
再回想自己生命在地上所追求的價值觀時，耶穌又值得為我自己捨命而死嗎？
主啊！多謝祢跟我們說話。我實在渴想祢醫治我受傷的心，好叫它從那裡伸向遠遠近近的人。我知道你也呼喚 : 「到我這裡來吧，凡勞苦擔重擔的人，都會得著安息。」正當祢繼續在歷史中受苦、死亡和復活時，請給我們盼望、勇毅和信心，好讓祢的心，把我們的心跟祢所有受苦子民的心聯合起來，而成為對方聆聽、同行與盼望的源頭。
（作者為關懷貧窮學校生命教育幹事）
