「拎親綜援嘅人都係呃綜援嘅。」
「貧窮線」、「綜援」、「N無人士」、「扶貧」、「劏房」呢啲有關貧窮政策的名詞，並不是由讀緊通識科嘅中學生講出嚟，而係一班只係小學四五年級的同學仔。
網上資料發達嘅年代，同學仔從媒體新聞得知有關訊息，根本沒難度，但係佢地點樣去解讀及詮釋呢啲貧窮狀況背後嘅意思，卻係另一回事。
例如，「拎親綜援嘅人都係呃綜援嘅」；「窮嘅人就係因為唔俾心機讀書」；「買唔到樓冇本事嘅人就要住劏房」；「拎綜援都係新移民，公公婆婆拎綜援一定係啲仔女唔養佢」。
而我地就嘗試以劇場的模式，希望與同學仔有更多嘅討論。阿謙就扮一位無家者瞓係地上，而我就做一位家長，與同學仔路過這位街友前面，然後向小朋友講：「你唔俾心機讀書，大個就好似呢個叔叔咁瞓街㗎喇」。
當呢幕完咗之後，我地問同學仔有否見過或聽過頭先嘅情景，點知佢地差不多個個舉哂手話 : 「爹啲、媽咪同老師成日講㗎啦！」
其實同學仔嘅反應，正正帶出及反映一個實況，原來並唔只係小朋友，或許大人甚至社會對貧窮、以及不同的基層勞動群體，都以一種「標籤化」與「污名化」的意識形態去建構及傳遞被曲解的形象與信息，而透過這種「身教」，一代咁承傳俾下一代。
之後，我再嘗試扮演一位外判清潔工友，坐係呢班同學仔面前與佢地嚟一個真情對話。講真，呢個其實唔容易，因為自己唔知道佢地會問我乜嘢問題。但亦正正希望透過我的演繹，就如真人圖書館一樣，提供一個開放嘅平台，讓佢代入一個外判清潔工友的實質處境，誘發同學仔不斷發問、對話和思考，而唔想使用以家長式的教育方法，去直接灌輸只是單方向的信息和數據。
成一個鐘時間我們冇用到powerpoint，但係同學仔所講所表達嘅其實好有power好有point，內容好豐富。其實佢地有佢地自己嘅睇法和想法，但需要提供一個彼此對等、互相專重嘅空間和氣氛俾一班小朋友。
好記得有一個同學仔有以下呢個回應：
「叔叔，你份工作其實咁辛苦，日曬雨淋，嗰啲垃圾又重又臭，但點解只有最低工資嘅回報？點解唔係$50一個鐘？$32.5一個鐘係香港點生活呀？」
而整個歷程中，希望俾同學仔知道貧窮問題除咗個人因素之外，其實同好多政策制度、社會資源分配有密不可分的關係。
我們亦唔係要講啲好深奧嘅大道理，而係想佢地知道自己在日常生活的處境中，原來同好多基層勞動群體都有關連，就如一位在街上的清潔工友、一位在餐廳洗碗嘅姨姨、在自己居住大廈的保安員叔叔，佢地都在社會及社區上有所付出及貢獻，希望小朋友懂得對身邊不同的人，多一份「尊重」，而少一點「歧視」；多一份「客觀的認識」，少一份「主觀的判斷」，從小學習一份易地而處的同理心，一份生命內在的靈性和態度。
（作者為關懷貧窮學校生命教育幹事。本文標題為編者所擬。）
