近呢两年，多左做大专社关组嘅体验训练，逐渐认识多左呢一代嘅大学生佢地究竟点睇贫穷呢个议题。除左呢个议题外，更加令我地了解多左大学生读书嘅心路历程。
佢地对本地贫穷议题有咩睇法？我谂除左读社工社会学嗰啲会有啲sense之外，读其他科嘅同学仔对呢个议题真系好有距离，除非本身系基层，否则佢地平日嘅生活只有屋企去院校然后返屋企，就系咁简单，亦可能会额外加上兼职或玩乐。喺生活里面完全接触唔到基层又唔睇报纸新闻，成个人与社会都脱晒节，但系其实呢种气氛由中学什至小学已经开始酝酿同令人习惯：中学嘅密习式补课同好忙好忙嘅schedule，根本就已经预备紧你个心要适应大学什至出嚟做嘢嘅生活节奏，社会时事呢啲只要我唔系拣呢啲科就根本事不关己，己不劳心。总之顺应个人主义嘅特色，搞掂好自己啲嘢先算，其他嘢留番俾其他人关注，贫穷问题就话知佢死，总之我就唔可以穷。
我曾经问过一班大学生：「点解你要读大学呀？」有个学生答我：「要脱贫罗！」呢个答案真系精准，直情道出现实社会嘅哀歌：我地系唔可以穷架，因为会被社会否定架！你会成为一个冇人欣赏认同嘅人，系千古罪人。呢种将贫穷妖魔化，意识负面化嘅思维，从西方封建主义去到资本主义阶级化嘅兴起，都系深深植入喺我地嘅潜意识中。所以，你穷就呢一世冇运行，同学仔参与体验领受到的只系唔关我事咪理，同埋以慈惠毒药派派派嚟麻醉自己未能对社会有所贡献嘅心态。
再同佢地讨论到点解你会拣呢科嚟读，有好多都会咁答你：「冇呀，佢收我咪读罗。」呢个答案突显出何等的被动，什至有啲唔在乎嘅感觉，但系佢地就系面对呢种状况，虽然唔排除有同学仔好有理想咁入到自己理想嗰科，但比例应该唔会太多。你试谂下，一个根本唔会俾你有梦想同幻想嘅社会，对于渴望有新主意、渴望有改变嘅年轻一代嚟讲，喺度生活真系无乜意思，因为社会根本唔俾你发挥，你嘅生活系社会塑造你嘅，你嘅身份地位以及成功取决于你合唔合符呢个社会嘅标准，而你失败就会被社会判为贫穷嘅失败者，好似班基层街坊咁，试问，又点可以产生有活力求变嘅年轻人？
其实有不少大学嘅学科，系喺好耐之前，一班宣教士凭住满腔热诚，为左改变世界而成立嘅，目的希望透过专门嘅研究，让呢啲学问可以做福人群，贡献世界。好似医科，其中一个目的系不论贫富，都可以享用接受专业治疗嘅权利，但现实好多国家都要你有钱先至可以有得医病，特别系强国。读经济嘅，其中一个目的系希望谂方法同研究能令全球经济体资源分配同发展可以均衡，唔会令某一方积财坐权太多，防止弱势者永远喺强权下被劳役同剥削，当然现实亦唔系咁理想啦。仲有好多学科背后都有其核心信念同价值，今日嘅大学生，又有几多会去回顾番起初先贤带俾我地呢啲咁重要嘅信息同启示？
（作者为关怀贫穷学校生命教育主任）
