上星期约左一间民间组织嘅社会服务机构交流，大家分享下各自工作嘅特色，睇下大家有冇得互相吸纳一啲可取之处，点知倾倾下，倾到一个位，大家都好有共鸣……由于我地都系有做教育嘅工作，咁当然大家都会好着紧带紧嘅活动背后俾到啲咩得着参与者，喺分享过程大家都不其然发现嚟参与认识以及服侍街坊嘅参与者（当中包括学生、教会信徒及商业机构义工居多）中，佢地多数嘅心态都系期望参与一啲派发物资形式嘅社会服务，而往往佢地都只系想参与一次。跟住我心谂：「下，乜而家仲有咁多人会想做呢啲救济式服务嘅咩？」对方讲番而家嘅情况系变本加厉，愈嚟愈多，多到一个点好似控制唔到啲人做呢样嘢咁……
其实从事社会服务嘅人好多都会发现呢个情况好耐，有时会见到有啲义工佢都费事搵机构安排，索性自己有钱买左啲物资就自发性喺街到派，有时什至话就话接触街坊，其实可能只系摆低左啲心意，连同个街坊讲多两句都冇就走左去。就好似无家者嘅情况，早几年又系见到有班义工，喺天气冻嘅时候好有心，特登走左去派被，但系佢地嘅行动好特别，就系当住个街友面前放低左张被，然后就会行开，连几句问候嘅说话都冇讲，冇几耐派完就走左。另一个情况系，见到个反应唔错播，有咁多人排队，最搞笑我地讲到啲搞手就系锺意啲人排队攞嘢……唔通咁先至有自我感觉良好嘅满足感？
我地倾到最后，有个反思就系：义工同自发组织者好锺意用呢种方式，唔单止系快靓正，容易处理，又唔会掂到制度同政治咁复杂。其实作为前线机构嘅我地，都有种责任去反省。试谂下，我地提供俾义工参与嘅服务，其实好影响佢地点睇关怀帮人呢啲野，你惯左俾佢地净系派物资，惯左净系俾佢探访，咁佢地就会觉得前线机构咪都系做呢啲人本服务之嘛。佢地都系向我地学习，不过最影响佢地嘅可能系社会嘅气氛同施政者对民生事嘅态度，一个只用觉得有钱就可以解决问题嘅政府永远唔能够解决贫富悬殊嘅问题，因为冇从一个根本性嘅制度同长远规划去着手改善，以其官僚同唔开放聆听社会意见嘅作风，实在难以对应到实际嘅需要。
要改变呢种气氛，真系好需要大家重新再检视社会服务嘅素质，特别系有好多人睇住点样去做服务嘅前线社福机构，并且持续关注政府施政处理问题嘅方法。
（作者为关怀贫穷学校生命教育主任。本文标题为编者所拟。）
