呢一晚，我地喺麦记过呢一晚，体会同睇见麦难民嘅安顿环境同状况，去左一间平时都比较旺嘅廿四小时店，零晨两点仍然是熙来攘往，顾客络绎不绝，基本上喺所有廿四小时运作嘅麦记，都应该会有喺呢到训嘅无家者，但呢一间，我真系想问，究竟可以点样先至训到，左面系对情侣嘅依泣声，细声讲，大声笑，好似一个每两分钟会响一次嘅闹钟，右面系播放紧最新韩剧嘅师奶，前面系有班劲讲粗口嘅Online Game团队，而后面，就有不停因为郁动身子而令到靠背不停震动嘅食客……喺四方八面嘅吵吵闹闹中，见到有个伏左喺檯到嘅身影，佢仿佛好似唔属于喺呢个吵吵闹闹嘅空间，喺佢好似训着嘅姿势嚟睇，佢嘅状态系寂静嘅，但唔代表佢听唔到声音，因为如果系人都应该会听到咁嘈嘅声音，除非佢唔系人……呢位街坊如何炼成静音嘅空间呢，佢真系训得着？俾我就训唔着，点训？你今日训得着，仲有听晚，后晚，一个月，半年……咁样冇可能训到，会死人架！如我所言，因为有人搭左佢檯，街坊又要搬个另外一张檯训，我谂呢啲情况，一晚出现数十次，佢边到系训，系「恰紧」，每一晚都系喺到恰紧……
又有一位街坊喺啲梳化边训，训到成个人打侧晒出走廊，但最搞笑系啲人喺佢身边行过唔理佢，掂行掂过，睇嚟佢真系好攰，攰到一个点话知你，撞到你咪撞到你，至少我有一两分钟深沉睡眠嘅时间，赚左！有人醒目搵到啲唔食人间烟火嘅笋位，可以闭目养神，好似嗰个系佢嘅私家位一样，原来麦记都有长驻同炒散，大家各自搵食，互不干涉，共存于同一空间内，渴求一阵子熟睡嘅时光……
佢地嘅存在就好似呢段文字咁，喺呢段时间post上网，根本就唔会有人见到，什至唔会留意佢地出现过……
点解佢冇地方训？因为租贵？因为个人问题？因为一个对社会无声嘅抗议？无家者有冇人关注呢？大把啦，桥底又有，清场又有，麦记麦难民都有，咁佢地嘅情况有冇改善到呢？冇……成日喺到谂，既然政府咁唔想佢地训街，咁咪立法罗，立法训街系犯法罗，但佢又冇立呀，冇立咁训街就冇问题啦，但系佢地又要喺佢地训嘅地方灑啲癢粉呀，又用水喉‘Fer’湿块地等佢地冇得训，总之就系话俾你知唔想见到你地班训街嘅，好啦，唔训公园啦，训喺条街到都得啦卦，又唔系喎，又叫食环嚟清佢地场，话佢地啲家档阻街？其实好简单，佢地根本唔当无家者系人，只有当佢地系唔存在又或者系要处理嘅死物，就可以好简单用「清除」或者「移走」去解决呢个问题就可以。
政府根本唔当佢地系人，同拾荒者一样，唔当执纸皮系一份工作，所以佢地执嘅纸皮系阻街，佢地嘅人身安全可以唔驶关注，令到好多拾荒长者成为好多交通意外中嘅亡魂，同样地，无家者嘅处境，无论系喺室内嘅麦难民定街上嘅风旅露宿，一样只定为阻掟同影响市容，若果掌权者愿意视佢地为拥有尊贵生命嘅一群，我相信街友可以有栖身之所，建立佢地自信等佢地可以搵番嘢做，若掌权者唔系下意识地无论喺行政处理以及施政方面教育市民进一步将佢地污名化，我相信唔会出现父母教细路：「你唔俾心机啲读书就听训街乞食啦，知唔知？」
无家者系人，就需要被尊重，无家者系一个生命就需要同理地关注佢地嘅需要，以不至于有生命被遗忘于生活嘅空间，唔好再令佢地好似post上面书嘅文字一样，转眼间就被人遗忘……
（作者为关怀贫穷学校生命教育主任）
