一個卅三度高溫的下午，與一班高小學生落區認識外判清潔工友，遇上六十五歲的娥姐（化名）。
開始時，娥姐對別人的接觸很抗拒，但最終也被小孩子可愛的笑容所感動，與他們展開了對話。
原來娥姐剛剛入職外判清潔工，今天首日上班就被安排負責清倒街上垃圾桶。娥姐向眼前幾位小孩子解釋說，因為今天是她第一天上班，但自己心裡其實未接受到要做這份在社會眼中，被視為厭惡和低下層的工作，不相信有人會願意主動走近，所以感到很奇怪和抗拒。
在傾談的過程中，娥姐問了同學仔一個問題。
「依家個社會同教育制度，一個DSE文憑試就決定咗一個年輕人嘅前途，你哋唔覺得有問題嗎？不過問你哋都冇用，你哋都話唔到事。」
之後，娥姐再向同學仔講：
「你哋要俾心機讀書呀！千奇唔好學阿婆咁冇用呀！不過雖然倒垃圾係好下等嘅職業，但係至少對得住良心，唔係嗰啲有權有勢嘅人，好似前南韓總統朴槿惠、我哋香港嘅特首咁樣，又貪污又以權謀私！所以你哋大個讀好書唔好學佢哋咁，只係為自己嘅利益去著想，要為社會嘅弱勢諗吓，就好似我哋呢啲外判工，得益咪係政府同商家囉！」
接著，娥姐說因為自己其實不太熟悉這區的街道，又擔心手推車上的垃圾袋會在途中滑倒，所以想我們帶路，陪她走一段路程。而這班小孩子竟然沒有拒絕，更不怕污糟用手去㩒住手推車上的黑色垃圾袋，陪伴娥姐行了幾條街和馬路。
臨離開時，娥姐更主動留下聯絡電話，希望大家可以再探望她，想請這班同學仔飲汽水。
事後問同學仔，落區前你們不是說怕污糟嗎？為何剛才見大家好主動去接觸那輛垃圾車，一點都不怕呢？
幾位小孩子好認真地回應說：
「唓！污糟咪洗手囉！我哋好想陪吓娥姐，好想認識佢好啲。頭先見到我哋行緊嗰陣，前面好多人都掩住個鼻，特登避開咁。但係婆婆其實好叻，佢仲識得好多嘢，仲話俾我哋知乜嘢叫『公義』，娥姐好值得尊重㗎！」
讓小孩子落區，給他們親眼看、親耳聽與親身感受在社會中有血有肉的故事，去反思如何去做一個有血有肉有感受的人。
（作者為關懷貧窮學校事工統籌）
