近呢兩年，多左做大專社關組嘅體驗訓練，逐漸認識多左呢一代嘅大學生佢地究竟點睇貧窮呢個議題。除左呢個議題外，更加令我地了解多左大學生讀書嘅心路歷程。
佢地對本地貧窮議題有咩睇法？我諗除左讀社工社會學嗰啲會有啲sense之外，讀其他科嘅同學仔對呢個議題真係好有距離，除非本身係基層，否則佢地平日嘅生活只有屋企去院校然後返屋企，就係咁簡單，亦可能會額外加上兼職或玩樂。喺生活裡面完全接觸唔到基層又唔睇報紙新聞，成個人與社會都脫晒節，但係其實呢種氣氛由中學甚至小學已經開始醞釀同令人習慣：中學嘅密習式補課同好忙好忙嘅schedule，根本就已經預備緊你個心要適應大學甚至出嚟做嘢嘅生活節奏，社會時事呢啲只要我唔係揀呢啲科就根本事不關己，己不勞心。總之順應個人主義嘅特色，搞掂好自己啲嘢先算，其他嘢留番俾其他人關注，貧窮問題就話知佢死，總之我就唔可以窮。
我曾經問過一班大學生：「點解你要讀大學呀？」有個學生答我：「要脫貧囉！」呢個答案真係精準，直情道出現實社會嘅哀歌：我地係唔可以窮架，因為會被社會否定架！你會成為一個冇人欣賞認同嘅人，係千古罪人。呢種將貧窮妖魔化，意識負面化嘅思維，從西方封建主義去到資本主義階級化嘅興起，都係深深植入喺我地嘅潛意識中。所以，你窮就呢一世冇運行，同學仔參與體驗領受到的只係唔關我事咪理，同埋以慈惠毒藥派派派嚟麻醉自己未能對社會有所貢獻嘅心態。
再同佢地討論到點解你會揀呢科嚟讀，有好多都會咁答你：「冇呀，佢收我咪讀囉。」呢個答案突顯出何等的被動，甚至有啲唔在乎嘅感覺，但係佢地就係面對呢種狀況，雖然唔排除有同學仔好有理想咁入到自己理想嗰科，但比例應該唔會太多。你試諗下，一個根本唔會俾你有夢想同幻想嘅社會，對於渴望有新主意、渴望有改變嘅年輕一代嚟講，喺度生活真係無乜意思，因為社會根本唔俾你發揮，你嘅生活係社會塑造你嘅，你嘅身份地位以及成功取決於你合唔合符呢個社會嘅標準，而你失敗就會被社會判為貧窮嘅失敗者，好似班基層街坊咁，試問，又點可以產生有活力求變嘅年輕人？
其實有不少大學嘅學科，係喺好耐之前，一班宣教士憑住滿腔熱誠，為左改變世界而成立嘅，目的希望透過專門嘅研究，讓呢啲學問可以做福人群，貢獻世界。好似醫科，其中一個目的係不論貧富，都可以享用接受專業治療嘅權利，但現實好多國家都要你有錢先至可以有得醫病，特別係強國。讀經濟嘅，其中一個目的係希望諗方法同研究能令全球經濟體資源分配同發展可以均衡，唔會令某一方積財坐權太多，防止弱勢者永遠喺強權下被勞役同剝削，當然現實亦唔係咁理想啦。仲有好多學科背後都有其核心信念同價值，今日嘅大學生，又有幾多會去回顧番起初先賢帶俾我地呢啲咁重要嘅信息同啟示？
（作者為關懷貧窮學校生命教育主任）
