上星期約左一間民間組織嘅社會服務機構交流，大家分享下各自工作嘅特色，睇下大家有冇得互相吸納一啲可取之處，點知傾傾下，傾到一個位，大家都好有共鳴……由於我地都係有做教育嘅工作，咁當然大家都會好著緊帶緊嘅活動背後俾到啲咩得著參與者，喺分享過程大家都不其然發現嚟參與認識以及服侍街坊嘅參與者（當中包括學生、教會信徒及商業機構義工居多）中，佢地多數嘅心態都係期望參與一啲派發物資形式嘅社會服務，而往往佢地都只係想參與一次。跟住我心諗：「下，乜而家仲有咁多人會想做呢啲救濟式服務嘅咩？」對方講番而家嘅情況係變本加厲，愈嚟愈多，多到一個點好似控制唔到啲人做呢樣嘢咁……
其實從事社會服務嘅人好多都會發現呢個情況好耐，有時會見到有啲義工佢都費事搵機構安排，索性自己有錢買左啲物資就自發性喺街到派，有時甚至話就話接觸街坊，其實可能只係擺低左啲心意，連同個街坊講多兩句都冇就走左去。就好似無家者嘅情況，早幾年又係見到有班義工，喺天氣凍嘅時候好有心，特登走左去派被，但係佢地嘅行動好特別，就係當住個街友面前放低左張被，然後就會行開，連幾句問候嘅說話都冇講，冇幾耐派完就走左。另一個情況係，見到個反應唔錯播，有咁多人排隊，最搞笑我地講到啲搞手就係鍾意啲人排隊攞嘢……唔通咁先至有自我感覺良好嘅滿足感？
我地傾到最後，有個反思就係：義工同自發組織者好鍾意用呢種方式，唔單止係快靚正，容易處理，又唔會掂到制度同政治咁複雜。其實作為前線機構嘅我地，都有種責任去反省。試諗下，我地提供俾義工參與嘅服務，其實好影響佢地點睇關懷幫人呢啲野，你慣左俾佢地淨係派物資，慣左淨係俾佢探訪，咁佢地就會覺得前線機構咪都係做呢啲人本服務之嘛。佢地都係向我地學習，不過最影響佢地嘅可能係社會嘅氣氛同施政者對民生事嘅態度，一個只用覺得有錢就可以解決問題嘅政府永遠唔能夠解決貧富懸殊嘅問題，因為冇從一個根本性嘅制度同長遠規劃去著手改善，以其官僚同唔開放聆聽社會意見嘅作風，實在難以對應到實際嘅需要。
要改變呢種氣氛，真係好需要大家重新再檢視社會服務嘅素質，特別係有好多人睇住點樣去做服務嘅前線社福機構，並且持續關注政府施政處理問題嘅方法。
（作者為關懷貧窮學校生命教育主任。本文標題為編者所擬。）
